Polísia Nasionál Timor-Leste (PNTL), serbisu hamutuk ho Polísia Repúblika Indonézia (POLRI), realiza seminár Internasionál durante loron rua (26 – 27 Novembru 2013) kona-ba droga no krime organizadu iha Sentru Konvensaun Dili.

Komandante Jerál PNTL, Komisáriu Longuinhos Monteiro hateten, Semináriu Internasionál ne’e importante tebes, tanba servisu ho instituisaun Polísia husi nasaun Indonezia, atu kombate krime sira.

“Ha’u hanoin, prespetiva kooperasaun polísia ne’e, haree ba krime organizadu, ne’ebé organiza sira-nia an ho maneira oioin”, nia esplika.

Longuinhos Monteiro  esklarese, liuhusi semináriu ne’e, PNTL ho Badan Nasionál Narkotika (BNN) hatudu kompromisiu hametin kooperasaun, atu kombate krime organizadu.

Iha fatin hanesan, Embaixadór Indonézia mai Timor-Leste, Primanto Hendrasmoro, realsa, semináriu ne’e bele tulun rezolve krime organizadu no droga sira iha Timor-Leste.

Semináriu internasionál ne’e, hetan partisipasaun máximu husi sosiedade sivíl, membru Governu, Igreja, estudante universitáriu no PNTL.