Governu Timor-Leste, liuhusi Sekretaria Estadu Defeza, iha Sesta 22 Novembru 2013, entrega ró funu rua ba Falintil – Forsa Defeza Timor-Leste (F-FDTL).

Sekretáriu Estadu Defeza, Júlio Tómas Pinto, agradese ba Governu Xina, ne’ebé kontinua hatudu komprimisu atu fó asisténsia ba komponenti Navál. Agradese mós ba nasaun seluk, ne’ebé tulun kapasitasaun rekursu materiál no rekursu umanu ba F-FDTL.

Júlio Tómas Pinto esplika: “Forsa Komponente Navál mak uza ró ne’e, atu kontrola situasaun rikusoin tasi nian iha Timor-Leste. Governu Timor-Leste mak sei tau-matan ba manutensaun ba ró sira”.

Entertantu Xefe Estadu Maiór F-FDTL nian, Major Jenerál Lere Anan Timur realsa, Komponenti Navál simu tan responsabilidade boot ida, iha Instituisaun F-FDTL, tanba simu tan ró rua, hanesan patrimóniu Estadu nian. “Ró rua ne’e hanesan ita-nia sasan rasik. Labele hanoin, katak, Estadu ninian ketak no ita-nian ketak,” nia hateten.

Partisipa iha serimónia entrega ró maka hanesan Sekretáriu Estadu Defeza, Xefe Estadu Maiór F-FDTL, Xefe Estadu Forsa Armada, Padre Kapelaun F-FDTL nian, Diretór Institutu Defeza Nasionál (IDN) no Komponente Navál tomak.