Sekretáriu Estadu Polítika Formasaun Profisionál no Empregu, Ilídio Ximenes da Costa, iha fulan Novembru tinan ida ne’e nian, entrega tan sertifikadu ba formandu na’in 66, ne’ebé remata ona sira nia kursu iha área administrasaun no kostura iha Sentru Formasaun Sekretariadu no Kostura Madre Madalena Morano – Fuiloro, suku Fuiloro, sub-distritu Lospalos, distritu Lautem.

Husi ema na’in 66 ne’e, na’in 63 husi área administrasaun no  kostura na’in 3. Sira partisipa iha kursu ne’e durante fulan ualu iha Sentru Formasaun no fulan rua hala’o prátika iha fatin servisu.

Sekretáriu Estadu Polítika Formasaun Profisionál no Empregu senti haksolok ho Sentru Formasaun ne’e. Tanba ne’e, Ilídio Ximenes da Costa husi ba manajemen Sentru Formasaun atu hadi’a sistema baze dadus nian, hodi kontrola formandu sira ne’ebé mak hetan ona servisu ho hira mak seidauk hetan servisu.

Sekretáriu Estadu mós informa, “Sentru Formasaun ida ne’e, hetan ona kualifikasaun nível 1 no 2 iha área administrasaun no kostura husi Institutu Nasionál Dezenvolvimentu Mão de Obra (INDMO)”.

Inês Freitas Bartolo, koordenadora kursu nian esplika, “objetivu ba formasaun atu prepara foinsa’e sira ho kulifikasaun profisionál, nakonu ho valór umanu no kristaun. Nune’e, bainhira remata kursu, prontu atu sai ativa iha vida sosiál, integra-an iha kampu serbisu nian ho dignidade, kompeténsia no sentidu responsabilidade.

Aleinde ne’e fahe mós sertifikadu, Sekretáriu Estadu entrega mós ekipamentu mákina suku roupa tolu ba formandu sira iha área kustura nian.