DEKLARASAUN PRIMEIRU-MINISTRU TIMOR-LESTE

SUA EXELÊNSIA KAY RALA XANANA GUSMÃO

4 Dezembru 2013

 

Timor-Leste lamenta tebetebes kona-ba asaun ne’ebé Governu Australianu no nia servisus intelijênsia sira hala’o relasiona ho atual arbitrajen internasional kona-ba espionajen ne’ebé atu hahú iha Hague.

Asoens ne’ebé Governu Australianu halo ne’e kontraprodusentes no naun-kooperativas.

Asalta fatin servisu reprezentante legal Timor-Leste ida nian no halo asaun agresiva ida hanesan ne’e hasoru testemunha xave, ida ne’e hahalok ne’ebé inkonsebível no inaseitável, katak ami nunka imajina, no la simu. Ne’e komportamentu ida ne’ebé la dignu, katak la di’ak, husi belun boot ida ou husi nasaun boot ida hanesan Austrália.

Timor-Leste fó valor ne’ebé boot tebetebes ba nia relasaun ho Austrália no ho povu Australianu tomak. Austrália hamriik iha Timor-Leste nia sorin iha tempu hirak ne’ebé susar no térus laran iha ami-nia nasaun nia istória. Asoens hanesan ne’e halo ami laran kanek no triste tebes tanba la reflete relasaun hanesan paízes viziñus ne’ebé fiar tebes duni malu, hatudu laran moos no transparênsia ba malu.

Ha’u husu ba Primeiru-Ministru Austrália nian, S.E. Señor Tony Abbott, atu esklarese kona-ba nia Governu nia asoens hasoru ami-nia reprezentantes legais no garante seguransa ba ami-nia testemuña hodi nune’e bele hetan rezolusaun ida ne’ebé lalais, justa no imparsial kona-ba kestaun importante ne’e.