Sorumutu estraordináriu Konsellu Ministrus iha loron 30 Novembru 2013
Prezidénsia Konsellu Ministrus
V Governu Konstitusionál
..............................................................................................................................
Dili, Loron 30 Fulan Novembru Tinan 2013
Komunikadu Imprensa
Sorumutu estraordináriu Konsellu Ministrus iha loron 30 Novembru 2013
Governu hala’o sorumutu estraordináriu iha Sábadu ne’e, loron 30 fulan Novembru tinan 2013, iha sala sorumutu Konsellu Ministru nian, iha Palásiu Governu, iha Dili no aprova ona:
1. Alterasaun ba Sirkulár Ezekuasaun Orsamentu Jerál Estadu nian ba tinan 2013
Alterasaun ida ne’e adia prazu ba submisaun, kona-ba pedidu sira pagamentu nian husi Ministériu no Órgaun Estadu nian sira, iha Tezouru, husi loron 29 fulan Novembru tinan 2013 ba fali loron 6 fulan Dezembru.
2. Dekretu-Lei ne’ebé aprova pagamentu saláriu báziku fulan ida nian ba setór públiku
Diploma ida ne’e aprova pagamentu estraordináriu, ho karákter úniku, saláriu báziku fulan ida nian ba funsionáriu no no ajente sira, maske temporáriu, maibé kontratadu ona durante pelumenus tinan ida, ba dirijente sira Funsaun Públika nian, ba sira ne’ebé naran tama iha lista iha artigu da-2 Dekretu-Lei ida ne’e nian no ba membru sira husi órgaun soberania Estadu nian.
Desizaun ida ne’e foti tuir polítika prezervasaun nian, valorizasaun, no rekoñesimentu rekursu umanu hirak ne’ebé liga ba Administrasaun Públika nian ne’ebé Governu mantein.
3. Kontratu ba Kriasaun Kadastru Nasionál no Rejistu Rai-Rohan nian iha Timor-Leste
Iha sekuénsia husi aprovasaun, ba Rezolusaun ne’ebé aprova prosedimentu Adjudikasaun nian husi projetu Kriasaun Kadastru Nasionál, iha loron 7 fulan Outubru liubá ne’e, Konsellu Ministru aprova ona, iha sorumutu estraordinária ida ne’e, termu kontratu nian atu asina ho konsórsiu Grupo Media Nacional – GMN, Holding no Arm Apprize.
