Ministériu Finansa (MF) asina akordu finanseiru foun rua ho Banku Dezenvolvimentu Aziátiku (BDA) no Banku Mundiál, iha loron 18 fulan Novembru, iha momentu inaugurasaun eskritóriu Misaun Rezidente BDA nian, iha Dili.

Iha serimónia simples ida, Ministra Finansa Timor-Leste, Emília Pires, no Diretór-Jerál Adjuntu husi Departamentu Pasífiku Banku Dezenvolvimentu Aziátiku nian, Noriko Ogawa, asina empréstimu ida ho valór millaun 50 dolar amerikanu atu hadi’a estrada ne’ebé liga Manatutu ba Natarbora, hanesan parte ida husi planu nasionál ida atubele kria rede estrada nian ida ne’ebé fiável no seguru, atubele aumenta tráfiku pasajeiru no naha sira nian, hodi hamenus tempu viajen. Iha parte seluk, reprezentante Banku Mundiál nian, Luís Constantino, asina ona ho MF empréstimu ida ho valór millaun 40 dolar amerikanu atu reabilita tomak estrada kilómetru 110 ne’ebé liga Dili ba Ainaru.

Ministra Emília Pires haktuir katak Governu Timor-Leste sente halsolok tebetebes tanba bele hakotu ona prosesu ida ne’e ho BDA no Banku Mundiál no hakarak atu hala’o servisu hamutuk nafatin durante faze implementasaun projetu ne’e nian.

“Hadi’a infra-estrutura ita nia país nian maka komponente-xave husi ita nia Planu Estratéjiku Dezenvolvimentu nian ba tinan 2011-2013. Ita presiza Estrada no ponte ne’ebé di’ak, atu nune’e bele harii ekonomia ida ne’ebé forte ba povu Timor-Leste”, Emília Pires hatutan.