Tuir Akordu kona-ba Kooperasaun Téknika nian ne’ebé selebra ona iha fulan Setembru liubá entre Repúblika Argentina no Repúblika Demokrática Timor-Leste, hala’o ona iha loron 13 fulan Novembru 2013 iha Sala VIP Ministériu Negósiu Estranjeiru no Kooperasaun, hanesan Misaun ba Kooperasaun Internasionál dahuluk nian entre Argentina ho Timor-Leste.

Sorumutu ne’e prezide husi Diretór-Jerál Relasaun Esterna Ministériu Negósiu Estranjeiru no Kooperasaun Timor-Leste nian, João Câmara no delegasaun  Argentina ne’ebé xefia husi Diretór-Jerál Kooperasaun Internasionál Ministériu Relasaun Esteriór no Kultu Argentina, Lucila Rosso.

Durante sorumutu, delegasaun rua ne’e ko’alia liuliu kona-ba Kooperasaun  Téknika Sul-Sul, nu’udar medida ida ne’ebé atubele halo elaborasaun estratéjia sira ne’ebé  efikáz atuhodi halo konsolidasaun ba relasaun sira entre rai rua ne’e.

Kooperasaun Téknika Sul-Sul ne’e vale iha períodu 2014–2016, ho formasaun iha área sira Administrasaun Públika no Funsaun Públika; Rejistu Públiku; Medisina Forense no Toksikolojia; Protokolu no Serimoniál; Jestaun kona-ba Parke Nasionál; Guarda Florestál; Jestaun no Protesaun Peska no Esplorasaun  Idrokultura.

Marka mós prezensa iha serimónia ne’e, elementu sira husi Ministériu Administrasaun Estatál, Ministériu Agrikultura no Peska, Ministériu Turismu,  Sekretáriu Estadu Kultura, Polísia Nasionál Timor-Leste no Ministériu Negósiu Estranjeiru no Kooperasaun.