Governu Timor-Leste

Ministériu Finansa asina Akordu ho IFC (International Finance Corporation) iha 6 fulan Novembru. Akordu ne’e aumenta tán kapasidade SERVE (Servisu Rejistu Verifikasaun Emprezariál). Iha serimonia asinatura ne’e Ministériu Finansa reprezenta husi Xefe Gabinete, Norberta Soares, SERVE reprezenta husi Diretór, Florenço Soares, no IFC reprezenta husi Sérgio Pimenta.

Akordu ne’e atu bele implementa servisu ho di’ak, hodi servi populasaun sira, liu-liu setór privadu no buka atu implementa sistema SERVE di’ak liutan.

Tuir Norberta Soares, Xefe Gabinete Ministériu Finansa, “Timor-Leste bele aprende, tanba IFC prepara ema ho esperiensia di’ak atu treinamentu no sira bele asiste ita, wainhira ita presiza, liuliu kona-ba sistema rejistu online ba negósiu sira. Ne’e  vantajen di’ak ba ita”.

Diretór SERVE, Florenço Sanches, hateten “SERVE rejistu kualker kompañia hosi rai laran ka rai liur. Hafoin rejistu, kompañia sira sei hetan sertifikadu ba Kompañia nia naran no serifikadu ekipa nian”.

Tuir Diretór IFC, Sérgio Pimenta, akordu ida-ne’e atu halo parseria entre IFC hanesan parte ida hosi setór privadu Banku Mundiál ho Governu no SERVE.

IFC sei apoia SERVE atu haree espesifikasaun, hanesan modelo no saida maka presiza ba sistema eletronika foun. “Hein katak, to’o tinan oin mai SERVE mós bele iha ona rejistu online,” nia hateten.

IFC  servisu ho Governu iha área rejistu komersiál hahú tinan 2009 no agora aumenta tinan ida tán, atu fo apoiu ba SERVE.

Primeira vez Timor-Leste adopta no implementa padraun internasionál, kona-ba komersiu, tanba Timor-Leste rasik mós nu’udar membru ba IFC.