“Estadu no povu Timor-Leste agradese ba apoiu husi nasaun Xina durante ne’e, hodi tulun dezenvolvimentu iha nasaun foun ne’e. Hein katak, relasaun amizade entre
nasaun rua ne’e, bele kontinua no metin liu-tan ba oin”, Vise-Primeiru-Ministru, Fernando La Sama de Araújo hateten lia hirak ne’e, iha Kinta loron 4 fulan Novembru, bainhira hala’o sorumutu ho ninia omólogu, Vise-Primeiru-Ministru Konsellu Estadu Xina nian, Wang Yang iha Macau.
Fernando La Sama de Araújo lidera delegasaun Timor-Leste nian hodi partisipa no lidera ekipa ida ne’e iha 4a Konferénsia Ministeriál ba Fórum Koperasaun Ekonómika no Komérsiál entre País sira Lian Ofisiál Portugés no Xina, iha Macau, loron 5 no 6 fulan Novembru.
Iha Fórum ne’e rasik, Governu Timor-Leste no Xina konsege asina akordu hodi hala’o koperasaun iha área balun hanesan turismu no komunikasaun sosiál.
Iha tinan 2014, Governu Xina sei ajuda orsamentu totál RMB 80 milloens mai Governu
Timor-Leste, hodi dezenvolve di’ak liután setór agrikultura no turismu.
Vise-Primeiru-Ministru Wang Yang elojia tebes progresu dezenvolvimentu iha Timor-Leste durante ne’e, inklui susesu ba dezenvolvimentu demokrasia iha nasaun foun ne’e, ne’ebé konsege hala’o eleisaun Prezidensiál no Parlamentár ona ho susesu.