Autoridade kompetente sira kaptura tiha dadur na’in 13 hosi na’in 24 ne’ebé halai sai iha Domingu, loron 3 fulan Novembru, hosi Estasionamentu Prizionál Becora. Operasaun sira atu hodi deskobre tan na’in 11 ida seluk, kontinua hala’o iha teritóriu tomak, liuhusi aksaun ida ne’ebé envolve Polísia Nasionál Timor-Leste (PNTL) no FALINTIL-Forsa Defeza Timor-Leste nian (F-FDTL).

Ministériu Justisa, iha Tersa-feira, loron 5 fulan Novembru, husu ba populasaun tomak atu kolabora ho autoridade kompetente sira, hodi fornese informasaun kona-ba paradeiru dadur na’in 11 ne’e. Autoridade sira, husu atu sira entrega-an iha prazu máximu loron tolu, nune’e bele evita, akuzasaun ida ba krime foun.

Dadur sira na’in 24 halai sai hosi komarka Becora, iha Domingu tuku 10 dadersan, hafoin   Selebrasaun Misa. Misa ne’e hanesan aktividade ida regulár ona iha Estabelesimentu Prizional Becora nian. Guarda prizional na’in 2 hetan kanek, bainhira tenta atu hapara dadur sira ne’ebé mak halai sai ne’e. Aleinde dadur sira baku guarda prizional, hosi fatin sira halai sai, sira halo aat mós ekipamentu informátiku no janela sala informátika nian, ne’ebé mak iha parte loron monun edifísiu nian.

Operasaun ne’e, alienede atu deskobre dadur hirak ne’e, autoridade sira mós halo investigasaun ba akontesimentu ne’e, hodi garante, katak situasaun ne’e, sei la koloka kauza seguransa ba País.