Sekretáriu Estadu Komunikasaun Sosiál, Nélio Isaac Sarmento, iha Kinta-feira, 31 Outobru, halo vizita ofisiál ba Konsellu Imprensa Indonézia nian, iha Jakarta.

Iha vizita ne’e, Sekretáriu Estadu hasoru malu ho Prezidente Konsellu Imprensa Indonézia, Bagir Manan, hodi ko’alia kona-ba preparasaun Timor-Leste nian, atu harii futuru Konsellu Imprensa, no husu atu Konsellu Imprensa Indonézia nian fó apoiu iha ninia prosesu estabelesimentu ba Konsellu Imprensa Timor-Leste nian ne’e.

Iha oportunidade ne’e, Professor Bagir Manan, hateten “Konsellu Imprensa Indonézia disponivél atu apoia prosesu estabelesimentu futuru Konsellu Imprensa Timor-Leste”.

Bagir Manan hatutan “ho experiensia Konsellu Imprensa Indonézia nian bele sai hanesan referénsia ba Timor-Leste, hodi harii Konsellu Imprensa nu’udar órgaun independente, atu hametin liberdade imprensa no espresaun”.

Surumutu ne’e termina ho konkordánsia katak, iha tempu badak sei asina nota entendimentu entre parte rua, hodi ofisializa apoiu sira ne’e.

Konsellu Imprensa Timor-Leste, sei estabelese bainhira proposta lei imprensa ne’ebé Governu aprezenta ba Parlamentu Nasionál hetan ona aprovasaun no promulga ona hosi Prezidente Repúblika. Maibé ninia prosesu hahú daudaun ho prepara estatutu Konsellu Imprensa. Jornalista ho ninia organizasan profisionál sira no media na’in, halo ona apresiasaun ba esbosu Estatutu Konsellu Imprensa no nomeia ona ekipa traballu ida hodi kontinua halo armonizasaun ba esbosu refere, iha Kongresu Nasonál Jornalista, Domingo (27/10) liubá iha Dili.