Membru FALINTIL–Forsa Defeza Timor-Leste (F–FDTL) hamutuk na’in 200 resin, halo ezersísiu “Kobra 13-2” iha suku Bobonaro (U’at), Sub-Distritu Bobonaro Distritu Bobonaro, Kinta, 24 Outubru 2013, ho nia objetivu atu aplika téknika no tátika defensiva.

Iha treinamentu ne’e, forsa Defensiva mai husi Komponente Terrestre Kompañia Charli no Forsa Naval unidade Fuzileiru, hanesan forsa insurgente (inimigo).

Komandante Tátika ezersísiu Kobra 13-2, Maijor Renilde Corte Real, ne’ebé akompaña ezersísiu ne’e, esplika, ezersísiu ida-ne’e hanesan senáriu ida atu defende Bobonaru, husi forsa um insurgentes ho lian Indonézia bolu GPK, ne’ebé la’o tun-sa’e.

No iha momentu ne’ebá, simu orientasaun husi Komandu Jenerál.

“Ha’u haree ezersísiu ne’e di’ak tebes, tanba tuir orientasaun orden operasaun ne’ebé halo no aprova husi eskalaun. Instrusaun ne’e la’o di’ak tuir mós ami-nia orientasaun”, Maijor Renilde  hateten.

Iha fatin hanesan, Ofisiál Avaliasaun, Maijor Bendito Quintas “Punufanu” observa, durante ezersísiu husi ofensiva no defensiva, la’o di’ak. Exetu, iha difikuldade no balu tanba kestaun lojístika.