Sekretaria Estadu Polítika Formasaun Profisionál no Empregu (SEPFOPE), suporta ekipamentu grupu servisu industria lokal iha distritu sira, hodi fasilita servisu no kapasidade ba produsaun. Serimónia entrega simbolikamente ekipamentu sira-ne’e, hala’o iha loron, 11 Outubru 2013 iha Díli.

Benefisiáriu sira ne’e mai hosi distritu Ermera, Likisá, Bobonaro, Kovalima, Ainaro, Manatutu Baukau, Dili (Hera no Manleuana), ne’ebé durante ne’e hala’o atividade iha área karpintaria, fase kareta, rental, fábrika blok, ofisina, doseria, borda makina, no grupu fila-liman ba negósiu ki’ik nian.

Diretór Diresaun Nasionál Empregu, Paulo Alves hateten, “Dezde 22 Jullu 2013 liuba, Sekretaria Estadu Polítika Formasaun Profisionál no Empregu aprova proposta 24 no asina akordu ho benefisiáriu sira ba programa auto-empregu, Programa autu-empregu ne’e, atu tulun sira kria servisu ba sira-nia aan rasik. Iha esperansa boot, sira mós bele sei fó servisu ba ema seluk, bainhira sira-nia jestaun lao dia’k no susesu”.

“Governu Timor-leste, liuhusi SEPFOPE sei kontinua fó formasaun emprezariál no fó apoiu ekipamentu hakbiit komunidade sira, ne’ebé iha inisiativa halo negósiu,” Paulo Alves hatutan.

Reprezentante grupu benefisiáriu, Luciala da Costa, agradese ba apoiu sira no promete atu utilize ekipamentu sira-ne’e didi’ak, atu negosiu la’o di’ak no lori benefísiu ba família no komunidade tomak.