Ministériu Turizmu, liuhusi Sekretária Estadu Arte no Kultura, iha loron 27 Setembru 2013 hala’o limpeza jerál iha Dili hamutuk ho funsináriu no estudante sira, hodi komemora loron Mundiál Turizmu tinan ne’e.

Atividade  limpeza jerál ne’e hala’o hosi área Bidau Santa-Ana to’o área edifísiu MENEK ho objetivu atu promove Dili sai sidade moos no pás.

Sekretária Estadu Arte no Kultura, Maria Isabel Ximenes, hateten, “selebrasaun loron mundiál turizmu ne’e, ho tema prinsipál mak bee-moos no turizmu, bazeia ba rezolusaun ne’ebé mak hasai husi Asembleia Jerál Nasones Unidas nian.

Sekretária Estadu ne’e hatutan, “bee-moos importante tebes ba ema nia moris no iha papél boot mós ba dezenvolvimentu setór turizmu. Ema hotu tenki uza bee ho kuidadu no responsabilidade. Laiha bee, setór turizmu mós labele la’o,” Maria Isabel Ximenes dehan tan.

Iha futuru, Ministériu Turizmu no Sekretária Estadu Arte no Kultura, sei kontinua esforsu maka’as atu hadi’a kualidade servisu iha área turizmu no  kultura nian no tau propriedade balun ba dezenvolvimentu setór turizmu iha Timor-Leste.

Iha fatin hanesan, estudante DIT ne’ebé partisipa iha atividade limpeza, agradese ba Ministériu Turizmu, tanba envolve sira iha komemorasaun loron Mundiál Turizmu.

Asaun ne’e, tuir estudante sira,  bele fanun komunidade labele soe fo’er arbiru. Nune’e,  meiu ambiente sei moos.