Ministériu Justisa (MJ) lansa Sistema Integradu Jestaun ba Informasaun (SIJI), iha loron 2 fulan Outubru,   iha Otél Timor, Dili, servisu hamutuk ho parseiru internasionál AUSAID, liuhusi Justice Facility. SIJI sei ajuda servisu Setór Justisa nian iha Timor-Leste atu la’o di’ak liutan iha futuru.

Ministru Justisa, Dionísio Babo iha diskursu hateten, “Timor-Leste hanesan nasaun joven, maibé  setór justisa komesa avansadu ona. Durante ne’e, parseriu internasionál sira sempre apoia maka’as no konsege estabelese Sistema Integradu Jestaun ba Informasaun”.

Ho sistema ne’e, tuir  Ministru Justisa, “bele konserva didi’ak dokumentu importante iha setór justisa no fasilita liña koordenasaun di’ak liu, entre instituisaun justisa nian sira hanesan, Tribunál Rekursu, Ministériu Públiku, Defensória Públiku no Polísia Nasionál”.

Entertantu,  Prezidente Tribunál Rekursu, Cláudio Ximenes mós rekuñese Sistema Integradu Jestaun ba Informasaun ne’e importante “atu ajuda instituisaun justisa nian iha Timor-Leste halo servisu ho profesionalizmu. Atu bele foti desizaun lailais, ita tenki esforsa aan uza sistema modernu ne’e, atu bele fasilita ita nia servisu iha futuru”, Cláudio Ximenes hateten.

Partisipa iha lansamentu, Prokuradór Jerál Repúblika, José Ximenes, Vise-Ministru Justisa, Ivo Valente, Prezidente Tribunál Rekursu, Cláudio Ximenes, Defensór Públiku Jerál, Sérgio Hornai, Juiz Administradór distritu Dili, Duarte Tilman, reprezentante Embaixadór Austrália nia ba Timor-Leste no korpu dipolomátiku sira  iha Timor-Leste.