Timor-Leste felisita aprovasaun, ho unanimidade, Rezolusaun 2118 husi Konsellu Seguransa Nasoins Unidas nian ba eliminasaun arma kímika sira iha Síria.

Repúblika Demokrátika Timor-Leste apoia desizaun husi Konsellu Ezekutivu Organizasaun nian ba Proibisaun Arma Kímika sira (OPAQ) atu estabelese prosedimentu espesiál sira ba harahun lalais arma kímika sira Síria nian no verifikasaun rigoroza ne’ebé tenke halo duni.

Povu no Governu Timor-Leste kondena maka’as uzu arma destruisaun masisa, liuliu arma  kímika no biolójika sira, ne’ebé uza kontra sé de’it. Seluk fali tan katak, uzu arma hirak ne’e nian nu’udar violasaun ba direitu internasionál no ameasa ida ne’ebé hatudu momoos ba Pás no seguransa internasionál.

Povu no Governu Timor-Leste kontinua akompaña ho neon sala tebetes no la hakmatek ho situasaun atuál iha Repúblika Árabe Síria, iha ne’ebé ema rihun ba rihun mate no  ninia sidadaun  millaun ba millaun tenke haka’as-an atubele hasés-an ba nasaun viziñu sira, nu’udar rezultadu husi konfrontu ne’ebé la para entre forsa Governu no opozisaun nian sira.

Ho nune’e, Povu no Governu Timor-Leste fó nia solidariedade ne’ebé sinsera liu ba Povu Síriu no husu boot atubele hetan lalais fila-fali Pás no prosperidade, hodi konfia ba ida ne’e katak Rezolusaun 2118 ne’ebé CSNU adopta sei fasilita diálogu no ajuda atu hetan solusaun polítika  naruk ida atubele hakotu kedas ona konflitu violentu iha Síria.