Sekretaria Estadu ba Polítika Formasaun Profisionál no Empregu (SEPFOPE), iha koordenasaun ho Organizasaun Internasionál  Serbisu nian (OIT- sigla iha lian Portugés), organiza workshop ida, iha loron 2 no 3 fulan Outubru nian, kona-ba saúde, ijiene no seguransa iha servisu-fatin, ne’ebé partisipa reprezentante sira husi servisu-na’in no empregadór sira.

Inspetór Jerál Traballu nian, Aniceto Leto Soro, loke workshop ne’e hodi koa’lia liu kona-ba importánsia implementasaun prátika hirak ne’ebé mak seguru iha servisu-fatin sira no presiza atu iha kolabarasaun ne’ebé besik liu entre empregadór sira no servisu-na’in sira, iha sentidu atu implementa polítikia ida ne’ebé previne asidente servisu nian, liuliu iha área hirak ne’ebé perigozu hanesan konstrusaun, iha distritu hotu-hotu iha Timor-Leste.

Lei Servisu nian foun ne’e, ne’ebé Parlamentu Nasionál aprova iha tinan kotuk, iha ona dispozisaun lubuk ida kona-ba saúde, ijiene no seguransa iha servisu hodi estabelese, iha sekuénsia husi buat ne’ebé hakerek ona iha Konstituisaun, direitu servisu-na’in hotu-hotu nian ba prestasaun servisu ne’ebé iha kondisaun saúde, ijiene no seguransa.

Iha sentidu atu dezenvolve sistema prátiku ida kona-ba protesaun servisu-na’in sira no regulamenta dispozisaun sira kona-ba Lei Servisu nian, SEPFOPE dezenvolve dadaun ona lejizlasaun iha área ida ne’e hodi hein katak ikus mai lejizlasaun ne’e bele diskute ho parseiru sosiál sira.