Repúblika Demokrátika Timor-Leste establese ona relasaun diplomátika ho Repúblika Letónia. Serimónia asinatura ne’e realiza ona iha Misaun Permanente República Letónia nian iha Nasoens Unidas, Nova Iorke, iha loron 27 fulan Setembru tinan 2013.

Ministru Estadu no Negósiu Estranjeiru no Kooperasaun Timor-Leste,  José Luís Guterres no Ministru Negósiu Estranjeiru Letónia, Edgars Rinkevics, assina ona Komunikadu Konjuntu kona-ba estabelesimentu relasaun diplomáka ne’ebé sei realiza entre Estadu rua ne’e.

Komunikadu ne’e espresa ka hatudu deseiju diak ida husi Governu Repúblika Demokrática  Timor-Leste no Governu República Letónia atu estabelese relasaun diplomática, akordu tuir prinsipiu no relasaun sira Nasoens Unidas no  Direitu Internasional nian, inklui Igualdade Soberanu Estadu, soberania, independênsia polítika, tratados internasional sira, integridade territorial no la halo intervinsau ba assuntu internu Estadu  ida idak nian, bem komu atu halo promosaun paz  no seguransa Internasional.

Estabelesimentu relasaun diplomátika entre Estadu rua ne’e formaliza iha konfimidade ho Kovensaun Viena konaba Relasaun Diplomátika, hosi loron 18 fulan Abril tinan 1961, hahu husi loron assinatura komunikadu konjuntu ne’e.

Iha konklusaun serimónia ne’e, Ministru husi nasaun rua ne’e fo sai katak sira sei asegura apoiu kopreensaun mútua, haforsa lasu amizade nian no kooperasaun povu husi rai rua ne’e.