Governu Timor-Leste liuhosi Ministru Turizmu, Francisco Kalbuadi Lay, inaugura Pouzada istóriku Balibo nomós partisipa selebrasaun tinan sanulu “Balibo Fort” kooperasaun hamutuk entre Governu Timor-Leste ho Governu Australia, iha loron 17 fulan Setembru 2013 iha Balibo.

Ministru Turizmu, Francisco Kalbuady Lay, informa katak objetivu husi selebrasaun ida ne’e atu fortifika istória Balibo, nu’udar loron importante tebes hodi hanoin hikas fali memória jornalista Australia sira ne’ebé fó an ba mate iha luta libertasaun Timor-Leste.

Minstru hatutan tan, “hadi Governu nia naran ha’u agradese ba Balibo Trust, administradór sub-distritu, komunidade Balibo nomós parseiru nasionál no internasionál nia kontribisaun ne’ebé servisu hamutuk hodi dezenvolve Balibo no la kleur tan sei harii Ótel Balibo, Timor-Leste iha potensialidade boot iha area turizmu ho beleza paizajen naturál ne’ebé iha futuru bele hatama reseita ba Estadu”.

The Balibo House Trust iha kontratu aluga durante tinan 30, projetu ne’e servisu hamutuk ho Governu Vitoria desde tinan 2002 hodi preserva istória no orijinalidade arkeolojia “Balibo Fort” nomós sai fatin muzeu iha Balibo.

Marka prezensa iha seremónia ne’e Ministru Turizmu, Vice Prezidente Parlamentu Nasionál, reprezentante hodi Governu Austalia, Embaixadór Australia, Embaixadór Nova Zelándia, nomós parseiru ONG nasionál no internasionál sira.