………………………………………………………………………………………………………………
Díli, Loron 1 Fulan Outubru Tinan 2013
Komunikadu Imprensa
Sorumutu Konsellu Ministru loron 1 fulan Outubru tinan 2013
Governu hala’o sorumutu iha tersa-feira ne’e, loron 1 fulan-Outubru tinan 2013, iha sala sorumutu Konsellu Ministru, iha Palásiu Governu, iha Dili no aprova ona:
1. Alterasaun dahuluk Estatutu Inspesaun Jerál Serbisu nian ne’ebé aprovadu ona husi Dekretu-Lei n.u 19/2010, loron 1 fulan-Dezembru
Inspesaun Jerál Serbisu nian harii iha tinan 2010 atu bele hadi’a no hametin servisu inspesaun nian ba serbisu iha rai-laran tomak. Ho objetivu atubele fó kapasidade téknika hirak ne’ebé presiza ba instituisaun ne’e atu kumpre nia funsaun sira, ninia estatutu prevee rejime kareira espesiál ida ho kategoria lima. Maske nune’e, seidauk iha norma tranzitória ida ne’ebé fó dalan ba ninia inspetór sira ne’ebé sujeita ba rejime karreira jerál Funsaun Públika nian atu muda fali ba rejime kareira espesiál ne’ebé kria ona. Nune’e, diploma ida ne’e kria baze legál ida ne’ebé fó dalan ba inspetór sira ne’ebé servisu ona atubele tama ba rejime karreira espesiál.
2. Dekretu Governu nian ne’ebé aprova kuadru Pasoál Servisu Apoiu Tékniku no Administrativu Prokuradoria-Jerál Repúblika nian
Dekretu Lei ne’e estabelese kuadru pesoál kareira Ministériu Públiku nian, ne’ebé mak define ona vaga sira ba kategoria karreira ida-idak, hanesan ho buat ne’ebé mak prevee ona iha orgánika Servisu Apoiu Tékniku no Administrativu Prokurodaria-Jerál Repúblika nian, ne’ebé aprova husi Dekretu-Lei n.u 6/2010, loron 14 fulan Abríl.
3. Alterasaun Dahuluk ba Orgánika Servisu Tékniku no Administrativu Prokuradoria-Jerál Repúblika nian
Alterasaun ba Dekretu-Lei n.o 6/2010, loron 14 fulan Abríl, ajusta Orgánika Servisu Tékniku no Administrativu Prokuradoria-Jerál Repúblika nian ba realidade foun instituisaun nian, atu nune’e bele koresponde kedas ba ninia nesesidade reál sira, hodi hasa’e kategoria husi servisu apoiu ba Prokuradoria-Jerál Repúblika nian balu ne’ebé importante atu hala’o ninia objetivu sira.
Tuir ninia natureza, Servisu Apoiu Tékniku no Administrativu nian nu’udar responsável ba prestasaun apoiu tékniku espesializadu, planeamentu instituisionál, jestaun finanseiru, patrimoniál no rekursu umanu sira, Prokuradoria-Jerál Repúblika nian.
4. Dekretu-Lei ne’ebé aprova Rejime Jurídiku kona-ba Lisensiamentu no Kontrolu Edifikasaun no Urbanizasaun
Hafoin halo tiha aprovasaun ba rejime jurídiku kona-ba sertifikasaun no inskrisaun empreza konstrusaun nian sira no konsultoria téknika sivíl no rejistu profisionál sira ho naran individuál (Dekretu-Lei n.u 27/2010 no Dekretu-Lei n.u 26/2010, rua ne’e hotu aprova iha loron 22 fulan Dezembru) Governu hakarak kontinua ho elaborasaun lejizlasaun kona-ba konstrusaun urbanístika.
Rejime Jurídiku kona-ba Lisensiamentu no Kontrolu Edifikasaun no Urbanizasaun sira nian halo parte norma sira ho natureza administrativa ne’ebé maka define kondisaun sira kona-ba aprovasaun prévia ba projetu sira no lisensiamentu obra sira, inklui nia kontrolu no fiskalizasaun, hodi estabelese mós rejime kona-ba sansaun sira.