Governu Timor-Leste no Japaun halo akordu atu hametin kooperasaun iha área formasaun ba FALINTIL – Forsa Armada Timor-Leste (F–FDTL), segunda-Feira, 16 Setembru iha Dili.

Asinatura akordu ne’e, hala’o husi Ministru Estadu no Negósiu Estranjeiru no Kooperasaun Timor-Leste nian, José Luís Guterres, no Ambaxadór Japaun ba Timor-Leste, Yoshitaka Hanada, ne’ebé asiste hosi Sekretáriu Estadu Defeza, Júlio Tomás Pinto.

Tuir Sekretáriu Estadu Defeza “liuhusi akordu kooperasaun ne’e, Governu Japaun sei haruka treinadór atu fó treinamentu mekániku ba membru F–FDTL sira, liuliu kona-ba oinsá bele rezolve problema no jestaun dezastre naturál sira”.

“Akordu ne’e pozitivu ba F–FDTL atu nune’e sira bele iha kapasidade atu hadi’a rasik karreta sira ne’ebé aat no rezolve mesak kestauan sira kona-ba mekániku nian. Nasaun barak, agora envolve militár sira atu rezolve problema no jestaun dezastre natural sira”, Júlio Tomás Pinto esplika.

Embaixadór Japaun iha Timor-Leste, Yoshitaka Hanada, iha oportunidade ne’e hateten, “Governu Japaun pronto atu apoia kapasitasaun ba F–FDTL. Tanba liuhusi akordu ne’e, sei hametin tan kooperasaun entre Timor Leste no Japan ba futuru.