Sentru Formasaun Téknika Komunikasaun (Ceftec: sigla iha lian Portugés) husi Ministériu Prezidénsia Konsellu Ministru hala’o Semináriu Komunikasaun da-II – Interasaun ho Média”, iha loron 13 fulan Setembru, iha Salaun Nobre Ministériu Negósiu Estranjeiru no Kooperasaun nian, iha Dili. Ne’e hanesan semináriu daruak komunikasaun nian ne’ebé Ceftec promove iha tinan 2013, kona-ba programa Komunikasaun Sosiál tinan 2012-2013, hetan orsamentu husi Uniaun Europeia no kooperasaun ne’ebé delega iha Portugál no hetan apoiu maka’as husi Embaixada Austrália no Embaixada Indonézia nian, iha Díli.
Sentru ne’e hala’o ninia servisu liliu ba ofisiál tékniku komunikasaun nian sira (media officer), ne’ebé tinan ne’e, simu formasaun intensiva kona-ba vertente sira oinoin husi área komunikasaun no relasaun públika sira, eventu ne’ebé, konta ho painél ida ne’ebé diversifikadu husi oradór nasionál no internasionál sira, hetan mós interese husi profisionál komunikasaun nian sira nune’e mós ho polítiku, estudante no instituisaun sira.
Iha abertura, Sekretáriu Estadu Komunikasaun Sosiál, Nélio Isaac Sarmento, hato’o boazvindas ba partisipante sira no salienta katak eventu ne’e ninia objetivu prinsipál maka kapasita rekursu umanu instituisaun públika sira nian ho kompeténsia espesífika sira iha área komunikasaun nian.
Iha Semináriu Komunikasaun da-II ne’e, hala’o mós serimónia entrega
sertifikadu partisipasaun nian ba profisionál timoroan husi Média hamutuk 150, ne’ebé tinan ne’e partisipa iha kursu espesializadu sira kona-ba jornalizmu.
Diskursu enserramentu nian halo husi eis-Primeiru-Ministru, Dr. Mari Alkatiri.
Marka prezensa iha eventu ne’e, Prezidente Komisaun Funsaun Públika, Eng. Libório Pereira, S.E. Sekretáriu Estadu Komunikasaun Sosiál, Nélio Isaac Sarmento, S.E. Sekretária Estadu Apoiu Setór Privadu nian, Veneranda Lemos, membru Parlamentu Nasionál sira, diretór-jerál sira, diretór nasionál sira, xefe departamentu sira, asesór imprensa sira, media officers, jornalista sira, estudante sira husi Komunikasaun Sosiál nian, no seluk tan.