Ministru Edukasaun, Bendito dos Santos Freitas, promete atu “hadi’a kualidade edukasuan iha teritóriu tomak, liuhusi Planu Programa Anuál Ministériu nian”. Ministru hato’o liafuan hirak ne’e bainhira halo sorumutu ho diretór Ensinu Báziku no Ensinu Sekundária iha Salaun Edukasaun distritu Viqueque, loron 7 fulan Setembru.

Iha sorumutu ne’e, diretór eskola sira hato’o preukupasaun kona-ba kursu formasaun lian Portugés,  estatutu profesór voluntáriu, saláriu minímu, kondisaun eskola sei aat, falta kadeira, meza, livru no materiál aprendizajen balun.

“Sorumutu ne’e, atu hatene koordenasaun servisu, liuliu kona-ba difikuldade no obstáklu ne’ebé Ministériu Edukasaun hasoru iha terrenu, iha parte infra-estrutura no seluk tan, atu Ministériu tau atensaun,” Ministru Bendito esplika.

Nia rekoñese, preokupasaun husi Viqueque nian nu’udar mós asuntu nasionál tanba kuaze eskola sira iha distritu hotu asoru problema hanesan.

Diretór Edukasaun distritu Viqueque, Emidio Amaral hateten, “kompromisu Ministériu Edukasaun nian atu hadi’a fasilidade no kualidade edukasaun, bele hatan ona ba preokupasaun husi diretór eskola sira iha distritu Viqueque. Diretór eskola sira rona rasik Ministériu nia planu, oinsá rezolve problema sira, inklui eskola nia kondisaun aat”.

Iha Viqueque, Ministru Edukasaun halo mós vizita ba Eskola Sekundária St. Cristovão, Eskola Sekundária Públiku 4 Setembru, Ensinu Báziku Kalixa, Ensinu Báziku Filiál Úlar Rihik Kraras, Ensinu Bázika No. 2 Cabira-oan no Ensinu Bázika Beloi, hodi haree rasik kondisaun eskola.