Ministéru Administrasaun Estatál (MAE) kontinua halo sensibilizasaun ba distritu sira, kona-ba pre-deskonsentrasaun administrativa, hodi hakat ba prosesu polítika desentralizasaun.
Bainhira halo sensibilizasaun ba lider komunitária sira iha sub-distritu Lakluta, distritu Viqueque, loron 10 fulan Setembru 2013, ho tema “Simu no tane ás estrutura pre-deskonsentrasaun administrativu hodi hakat ba prosesu polítika desentralizasaun”, Ministru Administrasaun Estatál (MAE), Jorge da Conceição Teme esplika, “sensibilizasaun hanesan parte integradu ida, hodi hakat ba prosesu deskonsentrasaun ba desentralizasaun nian. Sensabilizasaun ne’e, ho objetivu atu hasa’e ka eleva tan líder komunitária sira-nia responsabilidade servisu no atendimentu ba povu. Hatene oinsá sira dezenvolve rekursu umanu no rekursu naturál sira iha aldeia no suku idak-idak, atu kontribui iha dezenvolvimentu nasionál”.
Ministro mós husu ba foin sa’e no lider komunitária sira atu partisipa ativu iha programa no atividade dezenvolvimentu lorloron: “Povu nia moris di’ak iha futuru. Maibé, depende ba líder sira iha baze, prepara foin-sa’e no família sira, atu kaer servisu badinas, responsavél, iha domin no pás, atu rai Timor-Leste iha estabilidade. Nune’e, povu bele moris ho dignidade no forte iha futuru”.
Iha fatin hanesan, Administradór distritu Viqueque, Francisco da Silva, iha abertura agradese ba Ministériu Administrasaun Estatál, tanba bele informa ba komunidade kona-ba Prosesu Desentralizasaun Adminitrativu Podér Lokál nian, ne’ebé planeia ona husi V Governu Konstitusionál. “Ne’e hanesan mata-dalan ba ami, nu’udar autoridade lokál iha ami-nia distritu Viqueque,” Administradór distrito Viqueque, Francisco da Silva, hateten.
Partisipa iha enkontru, Administradór sub-distritu Lakluta, Rui da Costa, Diretór-Jerál MAE, Edgar Sequeira Martins, Xefe Departementu Diresaun Nasionál Administrasaun Lokál (DNAL), Hermes Verdial, Xefe Departementu Aprovizionamentu, Francisco Guterres, Asesór Martinho Abani, inklui Xefe suku no komunidade sub-distritu Lakluta tomak.