Ministériu Administrasaun Estatál (MAE) organiza sorumutu interministérial iha salaun Delta Nova, ho diretór-jerál, diretór nasionál, administradór distritu no sub-distritu sira, kona-ba implementasaun programa ministériu nian no nia dezafiu sira, hodi buka solusaun. Sorumutu ne’e hala’o iha loron 5 fulan Setembru 2013.

Jorge da Conceição Teme, Ministru Administasaun Estatál, hatetena “sorumutu ne’e atu haree kona-ba koordenasaun servisu ho ministériu relevante, liu-liu ministériu sira ne’ebé mak implementa programa iha baze, hanesan Ministériu Saúde, Ministériu Edukasaun, Ministériu Agrikultura no Pesca, Ministériu Obras Públikas no Ministériu Solidariedade Sosiál”.

“Ne’e importante, hodi halo koordenasaun di’ak ho ministériu relevante sira. No Ministériu husu sira atu koordena no komunika ho administradór distritu no sub distritu sira. Nune’e, bele kontrola servisu hotu, ne’ebé hala’o iha distritu no subdistritu”, Jorge Teme esplika.

Partisipa iha sorumutu ne’e, Ministru Obras Públika, Gastão Sousa, Vise-Ministra ba Étika no Prestasaun Servisu, Natália Araújo, Sekretáriu Estadu Dezenvolvimentu Lokál, Samuel Mendonça no Sekretáriu Estadu ba Assuntu Kombatente Nasionál, Júlio Sarmento da Costa.