Ministériu Solidaridade Sosial (MSS) liuhosi Vise-Ministru, Jacinto Rigoberto Gomes de Deus, asina Nota Intendimentu (Memorandum of Understanding – MoU) ho Organizasaun Não Governamental (ONG) Internasionál, Mercy Corps, atu hasa’e komunidade nia ekonomia, relasionadu ba programa jestaun risku dezastre sira, durante tinan rua hahú 2013–2015.

Hafoin asina MoU iha edifísiu MSS, Caicoli-Dili, iha loron 10 fulan Setembru, Vise-Ministru, Jacinto Rigoberto Gomes de Deus hateten, “Mercy Corps mak ONG internasionál ida husi Estadus Unidus Amerika nian, ne’ebé durante ne’e implementa programa mitigasaun, prevensaun ba área dezastre sira iha base. Programa ida ne’e sei hala’o iha distritu tolu, mak hanesan, distritu Dili, Ainaro no distritu Ermera”.

Vise-Ministru hatutan tan, “Ministériu Solidariedade Sosiál sei involve funsionáriu sira iha nasionál nomos DDMC (District Disaster Management Committee) iha distritu, atu akompaña Mercy Corps, durante implementasaun programa sira ne’e.

“Kona-ba orsamentu, Governu prepara kuaze USD 42 miliaun ba programa dezastre no programa seluk, inklui apoiu ba agrikultura no ba ONG Fundasaun Haburas”, tenik Vise-Ministru.

Partisipa iha serimónia assina MoU ne’e, Direitór Nasionál Jestaun Dezastre, Assesora Nasionál Gabinete Vise-Ministru no reprezentante ONG Internasionál Mercy Corps.