Ministériu Obras Públikas (MOP), liuhosi Diresaun Nasionál Rekursu Umanu, hala’o treinamentu ba tékniku sira husi Ministériu Obras Públikas ne’ebé pertense ba rejiaun Maliana, durante loron 4, hahú husi loron 2 to’o loron 5 fulan Setembru 2013, iha salaun Rejionál Obras Públikas nian, iha Maliana.

Diretór Nasionál Rekursu Umanu MOP, Celso da Costa Oliveira, hateten katak objetivu husi treinamentu ne’e maka atu prepara rekursu umanu sira Ministériu Obras Públikas nian iha distritu sira ba Kamára Munisípiu no atu aselera programa desentralizasaun.

Matéria hirak ne’ebé fó iha treinamentu mak hanesan jestaun aprovizionamentu no mós kontratu administrasaun. Sai nu’udar treinadór iha formasaun ne’e maka, Teguh Ungsiadi, espesialista ida husi Ministériu Obras Públikas Indonézia. Formasun ne’e realiza bazeia ba Kooperasaun entre MOP Timor-Leste ho MOP Indonézia.

Teguh Ungsiadi hateten katak kapasitasaun ba rekursu umanu ne’e importante tebes, atu nune’e prestasaun servisu bele la’o ho efisiente ho efetivu.

Aniceto Andrade, partisipante ida, senti treinamentu ne’e di’ak tebes, tanba liuhusi formasaun ne’e aumenta matenek no esperiénsia husi nasaun seluk hodi dehan: “Ita presiza aprende barak, atu bele dezenvolve rai ne’e ho di’ak iha futuru”, nia dehan.