Ministra Solidariedade Sosiál, Isabel Amaral Guterres, vizita Sentru Reabilitasaun Nasionál ASSERT (Assossiassaun hi’it Ema Raes Timor) iha Bekora, 4 Setembru, atu haree diretamente kondisaun moris reál defisiente sira nian.

Iha opurtunidade ne’e, Ministra mós fó apoiu ba fasilidade ba Sentru ne’e. Apoiu ne’e kompostu husi aitonka kalilin (43), aitonka liman sikun (46), kadeira roda ba ema boot sira (42), kadeira roda ba labarik sira (45), ne’ebé ho folin osan total besik $20.000 dólar amerikanu.

Ministra MSS, Isabel Amaral Guterres hateten, iha tempu uluk ASSERT hanesan NGO ida. Maibé, IV Governu Konstitusionál muda SRN sai Instituisaun Públiku iha MSS nia okos.

Ministra hatutan, iha tinan ne’e, governu tau ona orsamentu ba ASSERT atu uza hodi implementa planu no programa sira, liuliu atende defisiente sira-nia nesesidade.

Tuir Diretór Jerál Sentru, Rui Manuel Exposto, hateten “presiza atu modifika kaderia, tuir defisientes sira-nia kondisaun. Nune’e, defisiente sira bele book-an, atu bele ba sira-nia uma no fatin ne’ebé sira hakarak ba”.

SRN mós hakbesik-an ba komunidade sira iha distritu, hanesan agora dadaun iha distritu Same no sei ba mós distritu Ermera.

Aleinde ne’e, SRN mós halo advokasia hodi promove defisientes sira, liuliu organiza kompetisaun jogu bola basket ho kadeira roda ba feto no mane iha distritu Dili, Manatutu, Aileu, Ermera no Likisa no sei halo tan iha distritu seluk. Durante advokasia ne’e, SRN mós halo sosializasaun kona-ba óinsa promove defisientes sira-nia direitu.

Durante ne’e, SRN hetan apoiu orsamentu hosi Governu Timor-Leste no Parseiru Dezenvolvimentu sira hanesan SIBEM, JICA, AusAid, liuhusi ajuda finanseiru, ekipamentu no tékniku.

Iha dezenvolvimentu Institusional, SRN halo kapasitasaun ba staf sira atu bele servisu ho profisionalismu no kualidade no kapasita animadór sira hosi distritu, atu iha kapasidade hodi halo prevensaun sedu ba labarik sira ne’ebé moris mai ho problema fíziku.