Primeiru-Ministru Kay Rala Xanana Gusmão, kompleta ona ninia vizita ofisiál dahuluk ba Republika Demokrátika Populár Laos.

Primeiru-Ministru to’o iha kapitál, Vientiane, iha loron 9 fulan Setembru, hafoin ninia vizita ofisiál ba Reinu Kamboja. Formalidade ofisiál sira hahú iha loron tuir mai, ho serimónia boas-vindas nian iha Palásiu Governu, iha ne’ebé Primeiru-Ministru halo pasa revista ba Guarda Onra molok hahú konversasaun bilaterál sira ho ninia omólogo, Thongsing Thammavong.

Iha soromutu ne’e, Kay Rala Xanana Gusmão aproveita oportunidade atu halo deskrisaun sumária ida ba Primeiru-Ministru Laos nian kona-ba progresu Timor-Leste nian, hodi refere katak agora nasaun ne’e goza klima pás no estabilidade nian no tau ninia atensaun ba dezenvolvimentu.

Primeiru-Ministru realsa, mós, intensaun Timor-Leste nian hodi adere bá ASEAN no ninia kompromisu kona-ba kooperasaun no solidariedade rejionál. Kompromisu globál ba kreximentu país nian no importánsia ne’ebé koloka iha kooperasaun internasionál mós hetan esplikasaun. Ne’e inklui diskusaun kona-ba partisipasaun Timor-Leste nian iha g7+, grupu nasaun frajil sira ne’ebé afetada husi konflitu, no Sesaun da-69 UNESCAP nian.

Hodi salienta katak sira iha pasadu ida komún kona-ba kolonializmu no konflitu no partilla dezafiu ne’ebé hanesan, Primeiru-Ministru refere katak maske iha difikuldade ida ne’e, nasaun rua ne’e halo ona progresu konsideravel balun no partilla kompromisu ida ne’ebé kle’an kona-ba hadi’a kondisaun moris ninia povu nian.

Primeiru-Ministru Laos nian refere katak vizita Primeiru-Ministru Gusmão nian ida ne’e sai hanesan inísiu husi kooperasaun no amizade ida ba tempu naruk no iha área potensiál hirak ne’ebé seidauk esplora ba kooperasaun entre nasaun rua ne’e. Hodi akresenta, mós, katak ninia Governu iha kompromisu atu aprende no partilla esperiénsia ho Timor-Leste, no propoin vizita interkámbiu nian iha nível oinoin atu intensifika relasaun entre nasaun rua nian no servisu hamutuk, ba benefísiu mútuu. Primeiru-Ministru Thongsing Thammavongós repete apoiu husi ninia nasaun ba Timor-Leste atu tama ba ASEAN.

Iha segimentu husi diskusaun bilaterál sira ne’e, Primeiru-Ministru na’in rua asina Memorandu Entendimentu ida iha área ekonómika, komersiál no kooperasaun téknika, iha ne’ebé membru sira husi Governu rua ne’e maka sai hanesan testemuña, liuliu Ministru Turizmu no Sekretáriu Estadu ba Asuntu ASEAN husi parte Timor-Leste.

Xanana Gurmão kontinua ninia vizita ofisiál ho telefonema kortezia nian ida ba Prezidente Repúblika, molok tau koroa aifunan ida iha Monumentu ba Soldadu Deskoñesidu iha memória ba sira hotu ne’ebe fó sira nia vida iha luta ba Independénsia. Tuir mai, Primeiro-Ministru hasoru malu ho Prezidente Asembleia Nasionál, ne’ebé husu ba nia atu haruka konvite ida ba Prezidente Parlamentu Nasionál Timor-Leste, hodi vizita Repúblika Demokrátika Populár Laos.

Loron ne’e ramata ho han hamutuk ofisiál ida ne’ebé oferese husi Primeiru-Ministru Laos nian, nu’udar onra ba Primeiru-Ministru Xanana Gusmão.

Delegasaun ofisiál husik Vietname hodi hahú vizita ofisiál ida durante loron haat ba Myanmar, etapa ikus liu husi vizita loron 15, ba nasaun haat membru ASEAN nian.