Primeiru-Ministru husu ba joven sira atu hametin domin ba nasaun Timor-Leste, partisipa ativu ba dezenvolvimentu nasionál no kaer metin espíritu ukun rasik-an.

Kay Rala Xanana Gusmão husu ida-ne’e iha Dili, iha 30 Agostu 2013, bainhira selebra aniversáriu ba dala 14 (30 Agostu 1999 – 30 Agostu 2013) loron Konsulta Popular. Serimónia ne’ebé hala’o simples, sura mós ho partisipasaun Prezidente Parlamentu Nasionál, Vicente Guterres, membru Governu sira, sosiedade sivil  no komunidade. Aleinde ne’e, iha mós animasaun ho múzika husi artista timoroan sira, serimónia hahú uluk ho atividade la’o paseiu ka jalan santai.

Primeiru-Ministru mós dehan, “Ohin-loron ita ukun-an tiha ona, hetan tiha ona liberdade, tanba ne’e, presiza fó hatene ba hotu-hotu iha Timor laran tomak,  katak,  tempu to’o ona, atu hatudu fali hanesan uluk ferik no katuas sira hatudu iha funu laran. Sira la husu buat ida, hatene de’it sira-nia direitu, direitu atu ukun-an. Ohin loron, juventude sira kaer de’it mak sira-nia direitu atu ezije buat ruma ba Estadu no Governu. Haluha tiha sira-nia dever, atu kontribui ba harii nasaun no paz. Liutiha ona tinan 14 iha ambiente nasaun liderdade no tinan 11 iha prosesu konstrusaun nasaun nian, juventude sira presiza iha unidade, tau hamutuk hanoin no kapasita-an atu lori nasaun ne’e ba oin. Ha’u ezije, liu-liu ba jovem sira, jerasaun foun sira, atu haka’as-an, senti hanesan timoroan, lori sosiedade ida-ne’e, sai sosiedade di’ak iha futuru. Ami katuas sira la inveja. Ami-nia obrigasaun, mak konsege liberta tiha ona rai ida-ne’e. Agora entrega ba imi atu hadi’a di’ak liután ba jerasaun futuru”.  

Populasaun 451,792 rejistadu atu partisipa iha Konsulta Popular, 30 Agostu 1999, hodi foti desizaun simu ka rejeita Autonomia Espesiál ba Timor-leste iha Governu Indonézia nia okos. Husi totál ne’e, ema 438.968 mak partisipa Konsulta Popular.

Iha loron 4 Setembru 1999, Sekretariu Jerál Nasoins Unidas, Kofi Annan, anunsia rezultadu Konsulta Popular husi New York, katak husi votantes 438.968, ema na’in 94.388 (21.5%) hili simu Autonomia Espesiál no ema na’in 344,580 (78.5%) rejeita Autonomia Espesiál.