Primeiru-Ministru Timor-Leste, Kay Rala Xanana Gusmão, no ninia delegasaun, hakotu, ho susesu, vizita ofisiál loron tolu nian ba Repúblika Sosialista Vietname.
Iha loron 2 fulan Setembru, Primeiru-Ministru sai husi Dili hodi halo viajen semana rua nia laran ne’ebé lori nia ba Vietname, Kamboja, Laos no Myanmar.
Primeiru-Ministru Xanana Gusmão to’o iha kapitál Vietname nian, Hanoi, iha loron 3 fulan Setembru no halo intervensaun prinsipál ida iha Universidade Nasionál Vietname nian kona-ba “Konstrusaun Estadu: Esperiénsia Timor-Leste nian iha Kontestu Sudeste Aziátiku”. Membru korpu dosente nian sira no alunu sira rona palestra ne’e ho entuziazmu no hatudu sira nia interese atu estabelese programa interkámbiu kulturál ho estudante timoroan sira.
Iha loron 4 fulan Setembru hahú prosedimentu formál sira, ho serimónia solene iha Monumentu Erói Nasionál no Mártir sira. Primeiru-Ministru no ninia Komitiva, ne’ebé inklui Ministru Estadu no Negósiu Estranjeiru no Kooperasaun, Ministru Komérsiu, Indústria no Ambiente, Vise-Ministru Agrikultura no Peska, Sekretaria Estadu ba Asuntu ASEAN nian, hato’o sira nia omenajen iha Mausoléu fundadór Vietname nian, Prezidente Ho Chi Minh.
Hafoin, Primeiru-Ministru hala’o sorumutu ho ninia omólogu, Nguen Tan Dung, Primeiru-Ministru Vietname nian, iha Palásiu Governu ba diskusaun bilaterál sira. Iha sorumutu ne’e, xefe Governu rua nian konkorda atu esplora áera foun sira ne’ebé bele sai hanesan kooperasaun iha futuru, liuliu investimentu ekonómiku, agrikultura, esplorasaun no produsaun mina-rai no gás no dezenvolvimentu rekursu umanu nian sira. Aleinde kestaun bilaterál sira, Primeiru-Ministru na’in rua ne’e mantein iha diálogu ida ne’ebé konstrutivu kona-ba asuntu sira ne’ebé iha importánsia rejionál no globál.
Primemiru-Ministru Vietname nian reafirma apoiu husi ninia nasaun ba kandidatura Timor-leste nian atu sai membru ASEAN nian, hodi fó hanoin katak bainhira Timor-Leste tama iha ógaun rejionál ida ne’e sei hametin pás, estabilidade no kooperasaun hanesan belun nian iha rejiaun ne’e.
Nguyen Tan Dung, promote mós, atu fó apoiu nafatin husi ninia Governu ba prosesu dezenvolvimentu Timor-Leste nian. Timor-Leste no Vietname mantein ona relasaun kooperasaun ida ne’ebé fó benefísiu ba nasaun rua ne’e hotu. Timor-Leste importa foos husi Vietname no Vietname hala’o knaar importante ida iha diversifikasaun indústria telekomunikasaun nian iha Timor-Leste.
Vietname oferese-an atu sai hanesan uma na’in iha sorumutu Komisaun Mista kona-ba Kooperasaun entre Vietname no Timor-leste.
Iha sorumutu bilaterál, Timor-Leste repetehikas fali ninia apoiu ba kandidatura Vietname nian ba Konsellu Direitus Umanus ONU nian iha tinan 2014-2016 no ba Konsellu Seguransa ONU nian iha tinan 2010-2021.
Liu tiha sorumutu bilaterál, lider na’in rua ne’e asiste kedas asinatura Akordu Komersiál entre Ministériu Komérsiu rai rua nian, tuir kedas ho konferénsia imprensa konjunta ida.
Tuir mai, iha tempu kalan, Primeiru-Ministru Vietname nian organiza han-kalan ofisiál ida hodi fó omenajen ba Primeiru-Ministru Timor-Leste nian, hodi hatudu múzika no dansa tradisionál sira.
Primeiru-Ministru Xanana Gusmão hala’o mós vizita kortezia nian ida ba Prezidente Repúblika no Prezidente Asemblei Nasionál, no delegasaun ofisiál ne’e aproveita mós oportunidade atu vizita sede Viettel nian, empreza telekomunikasaun nian entre empreza tolu ne’ebé halo operasaun iha Timor-Leste.
Iha loron ikus vizita nian, delegasaun ofisiál halo viajen ida ba sidade Ho Chi Minh, iha ne’ebá Primeiru-Ministru hala’o sorumutu ho autoridade governu lokál no vizita Muzeu Vestíjiu Funu nian.
Husi sidade Ho Chi Minh Primeiru-Ministru no ninia komitiva liu ba Phnom Penh ba vizita ofisiál loron haat nian ba Reinu Kamboja.
Tinan ne’e, Primeiru-Ministru kompromete-an atu vizita membru ASEAN nian hotu-hotu atu hodi reforsa relasaun sira Timor-leste nian iha rejiaun ne’e. Kay Rala Xanana Gusmão vizita tiha ona Indonézia, Tailándia, Singapura no Filipinas.