Komunidade Aldeia 30 de Agostu, suku Fuiloro, sub-distritu Lospalos, distritu Lautem, entrega rai ektár 10, ba Ministériu Edukasaun ho objetivu atu harii Eskola Politéknika Turismu, Otelaria no Ospitalidade. Deklarasaun  entrega rai ne’e,  aprezenta husi Administradór Distritu Lautem, Zeferino dos Santos Sequeira, iha salaun edukasaun distritu  Lautem, sub-distritu Lospalos, kuarta-feira, 28 Agostu.

Iha deklarasaun konjunta, lia-na’in hamutuk ho Xefé suku Fuiloro apresia ba planu Governu liuhosi Diresaun Ensinu Superiór Ministériu Edukasaun nian, ne’ebé halo aproximasaun ba komunidade suku Fuiloro, molok harii projetu konstrusaun ne’e.

Komunidade suku Fuiloro, sub-distritu Lospalos, mak na’in ba rai no sai sasin ba eventu entrega rai, ne’ebé se lori benefísiu mós ba Lautem oan sira  no jovem Timor tomak iha futuru.

Komunidade garante, prosesu konstrusaun tomak sei la hamosu dezentendimentu no impedimentu, tanba konstrusaun politeknika hanesan modalidade ida, ba futuru Kámara Munisipiu distritu Lautem.

Hafoin serimónia entrega rai, Vise Ministru Ensinu Superiór, Marçal Avelino Ximenes, hateten molok atu halo konstrusaun iha tinan 2016, Governu sei halo estudu viabilidade no halo dezeñu atu hatene kustu orsamentu ba projeitu ne’e”.

Ministériu iha ona osan ba estudu viabilidade, maibé osan ba konstrusaun politéknika seidauk iha. Rezultadu estudu viabilidade ne’e, sei tau iha planu dezenvolvimentu atu lori ba Parlamentu Nasionál hodi aprova.

Aleinde estudu viabilidade ne’e, Ministériu Edukasaun mós oras-ne’e prepara ona rekursu umunu, atu prienxe kritéria harii eskola Politéknika Turizmu, Otelaria no Ospitalidade.