Ministru Petróleu no Rekursu Minerais, Alfredo Pires, iha inísiu fulan Augostu tinan ida ne’e, iha Díli, simu vizita delegasaun hosi Nasaun Repúblika Uniaun Myanmar.

Objetivu hosi sorumutu ne’e, atu buka hatene no hetan informasaun kona-ba ita nia Sistema Finanseiru no oinsá jere rekursu natural sira, hanesan mina no gás.

Durante sorumutu, Ministru Alfredo, informa, “kona-ba polítika no programa Ministériu nian, mak hanesan dezenvolvimentu Rekursu Umanu iha área petróleu, liuhosi kapasitasaun ba juventude sira, atu bele jere riku-soin mina no gás ho di’ak.

Hafoin sorumutu, Ministru Alfredo Pires, esplika, “Myanmar iha interese, atu hatene no hetan informasaun kona-ba ita-nia sistema finanseiru, no oinsá ita jere rasik ita-nia rekursu naturál sira”. Myanmar, tuir Ministru Alfredo, hakarak aprende kle’an liután kona-ba Timor-leste nia esperiénsia. “Sira mós hato’o sira-nia apresiasaun ba Timor-Leste nia dezenvolvimentu, ne’ebé alkansa ona. Bainhira sira fila, sei halo evaluasaun kona-ba sira-nia vizita iha Timor-Leste“, Ministru Alfredo dehan tan.

Aleinde hasoru malu ho Ministru Petróleu no Rekursu Minerais, delegasaun ne’e mós hasoru malu ho Primeiru-Ministru, Kay Rala Xanana Gusmão, Ministra Finansa, Emilia Pires, Prezidente ANP, Gualdino do Carmo da Silva, Prezidénte Timor GAP, E.P, Francisco da Costa Monteiro, Koordenadóra Nasionál TL-EITI, Elda Guterres no Sosiedade Sivíl.