Ministru Justisa, Dionísio Babo, hateten, “Ministériu Justisa iha ona planu atu kria lei foun ida, hodi regula kritéria atu sai juiz. Hosi kritéria sira ne’e, tenke iha esperiénsia servisu nian iha Ministériu Públiku ho Defensoria Públika”. Ministru Dionísio Babo Informa lia hirak ne’e bainhira dirije sorumutu ida ho Prezidente Tribunál Rekursu no Prokuradór Jerál Repúblika iha Ministéiu Justisa, iha semana ikus fulan Augostu nian.

Ministru Dionísio Babo esplika tan, “iha futuru, ema ne’ebe atu sai juiz, la’os de’it remata husi kursu, depois tuir kedas formasaun Majestradu, hotu tiha sai kedas juiz.  Ne’e labele, tenke ema ne’ebé iha ona esperiénsia servisu naton iha Ministériu Públiku ho Defensoria Públika, mak foin bele sai juiz, liuliu kona ba foti desizaun. Selae, ema ne’e bele domina matéria, maibé laiha kapasidade atu foti desizaun, tanba seidauk iha esperiénsia”. Nia informa mós, “ohin-loron tempu to’o ona, atu haree kualidade servisu, la’os hare de’it nia kuantidade”.

Prezidente Tribunál Rekursu, Cláudio Ximenes, apresia polítika foun ba kritéria rekrutamentu ba juiz sira, ne’ebé di’ak tebes, atu bele hadi’a juiz sira nia servsiu. “Pelumenus atu sai juiz ida, tenke iha uluk ninia karreira profisonál nian. Formandu sira labele tama kedan ba juiz”, nia dehan.

Prokuradór Jerál da Repúblika, José Ximenes, mós konkorda ho “ideia sira husi Ministru Justisa ho Vise Ministru Justisa atu kria lei ida, regula formandu sira ne’ebé remata formasaun hotu, labele sai kedas juiz, tanba sira-nia desizaun ba kazu ruma, bele prejudika setór justisa iha Timor-Leste”, esplika Prokuradór Jerál Repúblika, José Ximenes.