………………………………………………………………………………………………………………
Díli, Loron 31 Fulan Agostu Tinan 2013
Komunikadu Imprensa
Sorumutu Estraordináriu Konsellu Ministru nian iha loron 31 fulan Agostu tinan 2013
Governu hala’o sorumutu estraordináriu iha Sábadu ne’e, loron 31 fulan Agostu tinan 2013, iha sala sorumutu Konsellu Ministru nian, Palásiu Governu Dili no aprova ona:
1. Kontratu ba Projetu boot sira
Governu deside ona hodi estende kontratu sira ho empreza CNI22 no Bonifika (ne’ebé tama iha Projetu Nasionál Eletrifikasaun nian) hodibele garante konkluzaun di’ak projetu ne’ebé sei hala’o daudaun hela.
Konsellu Ministru mós análiza ona:
1. Termu Referénsia Konselleira Espesiál Nasoens Unidas nian ba para Timor-Leste
Konsellu Ministru análiza ona Termu Referénsia Konselleira Espesiál Nasoins Unidas nian ba Timor-Leste, Dra.Noeleen Heyzer, nomeada hosi Sekretáriu-Jerál Nasoins Unidas nian, Ban Ki-Moon, ho mandatu ida ne’ebé mak sei remata iha fulan Dezembru tinan 2014.
Maske nia hela-fatin laiha ne’e, Dra.Noeleen Heyzer sei asegura ligasaun direta ida entre Timor-Leste no Gabinete Sekretária Jerál Nasoins Unidas nian. Sei sai nu’udar liña orientadora iha área prioritária sira ne’ebé identifika tiha ona hosi Planu Estratéjiku Dezenvolvimentu (tinan 2011-2030), no área importante haat Governu nian: dezenvolvimentu kapitál sosiál nian liuhosi kapasitasaun no investimentu iha edukasaun no saúde; dezenvolvimentu infra-estrutura bázika sira; dezenvolvimentu ekonomia nian, liliu iha agrikultura, turizmu no indústria petrolífera; no konsolidasaun ba kuadru institusionál ba governasaun ne’ebé di’ak.
Konselheira Espesiál Nasoins Unidas nian sei desloka mai Timor-Leste iha fulan Setembru ne’e.
2. Orsamentu-Jerál Estadu ba Tinan 2014
Konsellu Ministru análiza ona proposta Orsamentu Estadu ba tinan finanseiru 2014 nian ho montante tuir kategoria despeza nian, ne’ebé haree fila-fali hosi Ministériu Finansa.