Governu Timor-Leste

Primeiru-Ministru, Kay Rala Xanana Gusmão, iha sekuénsia serimónia aniversáriu FALINTIL nian, loron 20 fulan Agostu, hala’o mós inaugurasaun segundu projetu Sentrál Elétrika Timor-Leste nian iha Suku Betano, Sub-distritu Same, Distritu Manufahi, ho ninia kapasidade 130 MW.

Xanana Gusmão, iha nia diskursu  hateten, “projetu estadu ne’e hahú nia estudu dezde kedas iha tinan 2008. Iha tinan 2009, Parlamentu Nasionál aprova osan  ba projetu boot ida-ne’e, hanesan projetu infraestrutura bázika. Tuir komesa hala’o projetu hodi harii torre no liña tranzmisaun sira hale’u Timór laran tomak. Projetu ne’e la’o ho difikuldade oioin. Maibé, ita hotu tenke agradese ba profesionalizmu kompañia no nia membru sira, ne’ebé ho susesu implementa projetu ne’e”.

“Oras ne’e, torre tranzmisaun hale’u Timor-laran tomak, kobre liña tranzmisaun ba alta tensaun nian kilómetru 715, liña tranzmisaun hosi média tensaun kilómetru 2,294 no média liña baixa tensaun kilómetru 255. Ida ne’e seidauk to’o ba uma hotu-hotu, maibé servisu sei la’o nafatin. Ne’e, hodi permiti ba povu, katak, sakrifísiu ne’ebé povu tomak hasoru iha tinan 24 nia laran, bele hetan nia rezultadu mak fó naroman ba uma kain hotu-hotu”, Primeiru-Ministru dehan.

Primeiru-Ministru, hatutan, “prezensa eletrisidade iha uma kain ida-idak, sei muda familia sira-nia kondisaun ekonomia no moris lorloron nian. Tanba ne’e, eis Prezidente Repúblika ne’e, husu ba povu atu aproveita eletrisidade no dezenvolve moris ho kreatividade. Maske nune’e, nia husu ba Xefé suku, Administradór sira no responsavél hotu-hotu iha Timór laran tomak, atu tau-matan ba maneira uza eletrisidade iha komunidade nia leet”.

“Dala barak iha fatin barak tebetébes, loron-manas boot mós ahi sei lakan iha varanda. Tanba ne’e, governu hahú daudauk ona, husu b ita hotu, atu selu eletrisidade. Ha’u fiar katak, bainhira ita komesa selu tarifa eletrisidade, mak ema hotu sei redúz gasta enérjia elétrika,” Xanana dehan.

Marka prezensa iha serimónia inaugurasaun ne’e, Prezidente Repúblika, Taur Matan Ruak, Prezidente Parlamentu Nasionál, Vicente Guterres, Prezidente Tribunál Rekursus, Cláudio Ximenes, reprezentante Kompañia WIKA, Membru Governu, Membru Parlamentu Nasionál, no Komunidade Distritu Manufahi.