Vise-Ministru Solidariedade Sosiál, Jacinto Rigoberto de Deus ho Ministra ba Dezenvolvimentu Internasionál Austrália, Melissa Parke, halo vizita ba PRADET no Sentro Reabilitasaun Nasionál (ASSERT)iha Dili, iha segunda-feira, 5 Agostu atu haree diretamente kondisaun iha fatin hirak ne’e.

Hafoin vizita, Ministériu Solidariedade Sosiál no Ministériu Dezenvolvimentu Internasionál Austrália sai hanesan parseiru iha área violénsia doméstika bazeia ba jéneru.

“Liuhosi Australian Agency for International Development (AusAID), governu Austrália suporta anualmente, orsamentu ba instituisaun hirak ne’e, liuliu PRADET, liuhosi justice facility. Dezde tinan 2002 to’o tinan ne’e, AusAID suporta ona orsamentu kuaze $1,6 milloins dollares amerikanu”, hateten Melissa Parke.

Iha Sentru Reabilitasaun Nasionál, Ministra ba Dezenvolvimentu Internasionál entrega apoiu orsamentu kuaze  rihun $40 dolar amerikanu,  liuhosi programa East Timor Community Assistance Scheme (ETCAS), atu halo kadeira roda hodi fornese ba ema defisiente sira.

Vise-Ministru hatutan liu tan katak, AusAID dezde primeiru Governu fó nafatin apoiu ba Governu Timor-Leste, liuhosi Ministériu Solidariedade Sosiál, ba dezenvolvimentu polítika nasionál ba defisiente sira.

“Agora dadauk, iha ona sector working group sia (9), mak atu dezenvolve polítika ne’e, atu tau ba planu asaun”, hateten Jacinto Rigoberto de Deus.

Nia mós senti kontente, tanba bele vizita Timor-Leste ba dalauluk, atu haree diretamente programa serbisu ba dezenvolvimentu, kria relasaun di’ak ho Governu Timor-Leste no asegura programa sira ne’e hodi fó benefísiu ba Timor-Leste. “Presiza hala’o servisu efetivu ba ema defisiente sira”, nia dehan tan.

Iha vizita ne’e, akompaña mós hosi Embaxadór Austrália ba Timor-Leste,  Miles Armitage, Xefe AusAID nomós Diretór hosi Instituisaun ida-idak ho ninia funsionáriu sira.