Ministériu Solidariedade Sosiál (MSS), halo vizita estudu komparativu kona-ba prátika harii Paz no Nasaun iha Nepal, durante semana ida, hahú hosi loron 29 Jullu to’o loron 4 fulan Augostu 2013.

Ministra Solidariedade Sosiál, Isabel Amaral Guterres, iha konferénsia ba imprensa hafoin fila hosi vizita ne’e hateten, “Vizita ne’e hanesan oportunidade ida kapás tebes, atu aprende no fahe esperiénsia ba malu. Iha Nepal, kada ministériu iha ona esperiénsia estratéjia dezenvolvimentu no implementasaun nian, ne’ebé suporta mitigasaun konflitu, prevensaun konflitu no harii-pás. Durante ne’e, Nepal aplika estratéjia aproximasaun integradu, ne’ebé hanaran “Do No Harm” (labele halo susar), ba programa dezenvolvimentu, atu halo programa sira ne’e atu sensibiliza ema kona-ba konflitu”.

“Aleinde ne’e, Nepal hanesan nasaun dahuluk husi Azia do Súl ne’ebé mak iha nível nasionál uza matadalan husi Estratéjia ba Jéneru no Inkluzaun Sosiál no hetan susesu di’ak. Ami hanoin, atu adopta buat rua ne’e ba kontestu Timor-Leste, sei hahú implementa uluk iha MSS”, Isabel Amaral Guterres tenik tan.

“Nepal mós iha istória ne’ebé mak estabelese di’ak tebes, kona-ba uza mediasaun komunidade hanesan xave atu promove desentralizasaun Governu lokál, ne’ebé efikás no promove rezolusaun ba konflitu iha nível lokál ka suku sira. Tanba ne’e, ha’u mós konvida ona Ministru ba Pás no Rekonstrusaun (MPR) no Ministru ba Dezenvolvimentu Estranjeiru no Lokál (MDEL) Nepal nian atu mai vizita Timor-Leste hodi aprende husi ita nia esperiénsia no mós fahe sira nia esperiénsia mai funsiunárius MSS nian. “Nepal mós bele treinu ita kona-ba sensibilizasaun konflitu, tanba agora dadauk Timor-leste seidauk iha espesialista iha área ida ne’e”, esplika Ministra.

Hamutuk ho Ministra Solidariedade Sosiál iha vizita Estudu komparativu ne’e, Diretór ba Asisténsia no Koezaun Sosiál, Amândio Amaral Freitas no Xefé Departamentu ba Harii Pás no Koezaun Sosiál (DHPKS), Agostinho Cosme Belo.