………………………………………………………………………………………………………………
Díli, Loron 13 Fulan Agostu Tinan 2013
Komunikadu Imprensa
Sorumutu Konsellu Ministru nian iha loron 13 fulan Agostu tinan 2013
Governu Konstitusional da-V hala’o sorumutu ida tersa-feira ne’e, loron 13 fulan Agostu tinan 2013, iha sala sorumutu Konsellu Ministrus nian, iha Palásiu Governu, iha Dili, no aprova tiha ona:
1. Rezolusaun Governu ne’ebé mak aprova Efektivu Anuál atu Inkorpora iha F-FDTL
Konsellu Ministru aprova ona Rezolusaun ne’ebe aprova efektivu anuál atu inkorpora (halo parte) iha F-FDTL ba tinan 2014.
Rezolusaun ida ne’e mosu tanba iha nesesidade atu kumpri objektivu hirak ne’ebé estabelese ona iha orientasaun estratéjika sira (Forsa 2020), ne’ebé mak prevee efektivu sira na’in 3600 (rihun tolu atus neen) to’o iha tinan 2020, hodi defini katak efektivu anuál ne’ebé atu inkorpora iha tinan 2014 mak feto/mane na’in 500 destinadu ba klase Prasa.
2. Dekretu-Lei ne’ebé Aprova Alterasaun Dahuluk ba Dekretu-Lei ne’ebé Aprova Estatutu Karreira Dosente Univeritária nian
Ministériu Edukasaun hetan ona aprovasaun ba Dekretu-Lei ne’ebé aprova alterasaun dahuluk ba Dekretu-Lei no 7/2012, loron 15 fulan Fevereiru, kona-ba Estatutu Karreira Dosente Universitária nian.
Rejime progresaun iha kareira dosente ne’ebé kontempla iha diplona ida ne’e, konsagra regra kritériu nian lubun ida, atu hetan fiar, hanesan promosaun ba korpu dosente ne’ebé exelente, instituisaun ensinu superiór nian sira no sistema ensinu superiór timoroan nian rasik, públiku no privadu.
Alterasaun dahuluk ne’ebé aprova ona liu-liu, kona-ba iha kategoria profisionál rejime karreira nian, iha rejime husi omologasaun ofisiál, iha prosesu sertifikasaun dosente universitáriu nian atu hetan progresaun iha kareira, tuir kritériu hirak ne’ebé relasiona ho avaliasaun ba dezempeñu dosente sira nian, iha revizaun ba dispozisaun sira kona-ba kálkulu ba saláriu no komplementu sira no mós iha rejime lisensa iha loron sábadu nian.
3. Dekretu-Lei ne’ebé Aprova Estrutura Pré-Deskonsentrasaun Administrativa
Konsellu Ministru aprova ona Dekretu-Lei ne’ebé aprova estrutura pré-dezkonsentrasaun administrativa ne’ebé hato’o hosi Ministériu Administrasaun Estatál.
Dekretu-Lei ne’e estabelese organizasaun no funsionamentu estrutura pré-dezkonsentrasaun administrativa nian sira ne’ebé mak forma hosi servisu perifériku administrasaun direta Estadu nian, iha Ministériu Administrasaun Estatál nia laran, ne’ebé mak hetan autonimia administrativa.
Estrutura pré-dezkonsentrasaun administrativa nia objektivu sira mak atu asegura, iha nível atuasaun ba área jeográfika sira rasik, implementasaun programa dezkonsentrasaun administrativa Governu nian, promosaun ba aktuasaun koordenada ba servisu dezkonsentradu hotu-hotu Estadu nian no atu apoia teknikamente ba aktividade sira ne’ebé lideransa komunitária tradisionál no organizasaun naun–governamentál sira mak hala’o.
4. Rezolusaun Governu nian ne’ebé Nomeia Reprezentante ba Projektu Dezenvolvimentu Ekonómiku Integradu
Hafoin hala’o tiha aprezentasaun iha Sorumutu Estraordinária Konsellu Ministru nian, iha loron 29 fulan Jullu, mak Konsellu Ministru aprova tiha Rezolusaun ne’ebé nomeia João Mendes Gonçalves, Ministru Ekonomia no Dezenvolvimentu iha IV Governu Konstitusionál, hanesan reprezentante Estadu Timor Leste nian no xefe Unidade Misaun ba negosiasaun no estabelesimentu plataforma kooperasaun no dezenvolvimentu ekonómiku rejionál integradu entre Timor-Leste, Indonésia no Austrália.
Konsellu Ministru mós analiza ona:
1. Levantamentu kona-ba Infra-estrutura hirak ne’ebé mak aat husi alterasaun klimátika sira
Sekretáriu Estadu Obras Públikas hato’o ba iha Konsellu Ministru levantamentu ida kona-ba ponte no estrada balun ne’ebé, aat tiha tanba alterasaun klimátika sira, no tanba ne’e presiza halo servisu reparasaun nian ne’ebé prioritáriu.