Sekretáriu Estadu Juventude no Desportu, Miguel Manetelo, akompaña hosi Vise Ministra Ensinu Báziku, Dulce de Jesus Soares, vizita Sentru Komunitáriu Aprendizajen distritu Ermera, iha loron 26 fulan Jullu 2013.

Ema na’in 100 husi suku 5, kompostu husi Suku Eraulo, Lauana no Katrai Kraik iha Sub-distritu Letefoho nomós Suku Parami no Baboe Kraik, Sub-distritu Atsabe, mak oras-ne’e tuir kursu iha Sentru Apredizajen ne’e, kada suku haruka ema na’in 20.

Sekretáriu Estadu Juventude no Desportu, Miguel Manetelu, esplika, “Sentru Aprendizajen Komunitária iha distritu Ermera, hanesan projetu pilotu. Tanba tuir dadus estatístika nian tinan 2010, hatudu numéru analfabetizmu joven ho idade 15 -24 atinji 25% mak la iha asesu ba eskola. Ho programa ne’e, ita fiar bele redúz númeru analfabetizmu,” Miguel Manetelu dehan.

Hanesan projetu pilotu, sentru ne’e sei loke tan ba suku balun iha distritu hotu, suporta hosi UNICEF, koopera hamutuk ho SEJD no Ministériu Edukasaun.

Dulce de Jesus Soares, esplika, “programa sira ne’ebé hala’o iha sentru ne’e, mak hanesan desportu, rekreativu, arte, interkámbiu no diskusaun grupu”.

Vise Ministra Ensinu Báziku husu ba partisipante sira, atu aprende didi’ak tanba sei liu faze tolu hanesan, faze inísiu, faze dezenvolvimento no faze avansadu, mak bele hetan ezame ekivalénsia ba Ensinu Báziku.

Durasaun tempu loloos fulan neen, maibé tanba programa pilotu maka tenki kontinua to’o tinan ida resin.

Sentru ne’e hetan apoiu ba fasilidade desportu hanesan viola, bola futeból, bola voleiból, rede volei, rede baliza no kadeira 20.