Ministru Obras Públikas (MOP), Gastão de Sousa, hamutuk ho Diretór Nasionál Estrada no Kontrola Xeias, Rui Hernani no tékniku ministériu nian, halo monitorizasaun ba projetu reabilitasaun estrada no ponte iha distritu Lautém no distritu Baukau, durante loron tolu, hahú loron 25 to’o 27 fulan Jullu 2013.

Monitorizasaun ne’e hala’o ba projetu boot 4 husi fundu infraestrutura. Primeiru projetu estrada hirak ne’ebé liga Laga–Bagia–Uatu Karbau, kaer husi kontratór Rubu Lari. Ida seluk mak estrada husi Lospalos ba Luro, ne’ebé kaer husi konsórsiu ASCEM “CACM” no terseiru mak reabilitasaun estrada Lospalos–Tutuala fó fiar ba kompañia Miguel Group. Entretantu, kompañia KIAR MAEK mak reabilita estrada Lospalos–Iliomar.

Ministru Obras Públikas, Gastão de Sousa, hateten, “monitorizasaun ne’e realiza tanba bazeia ba relatóriu husi konsultór ho ekipa regionál, ne’ebé identifika servisu reabilitasaun estrada balun, ladún la’o ho di’ak. Nomós projetu fíziku ladún adiantadu, tuir programa Ministériu nian”.

“Loloos kompañia sira tenki finaliza tuir oráriu no garante kualidade. Nune’e, povu bele uza ba tempu naruk. Ministériu sei la halo estensaun ba kontratór sira, ne’ebé halo servisu la remata tuir kontratu”, Ministru dehan tan.

Iha biban ne’e, Diretór Nasionál Estrada no Kontrola Xeias, Rui Hernani esplika, “ Problema obra balun seidauk finaliza, tanba kontratór sira iha difikuldade oin-oin, hanesan limitasaun ekipamentu, rekursus umanu nomós finanseiru.

Vise Prezidente Kontraktor ASCEM”CACM”, Armindo Sanches informa, “mudansa klimátika hanesan obstákulu ida atu finaliza servisu projetu nian tuir planu no mós iha atrazu husi dezeñu hosi arkitetu Ministériu Obras Públikas nian”, nia esplika.