Sorumutu Estraordináriu Konsellu Ministru nian iha loron 2 fulan Agostu tinan 2013
Prezidénsia Konsellu Ministrus
V Governu Konstitusionál
..............................................................................................................................
Díli, Loron 2 Fulan Agostu Tinan 2013
Komunikadu Imprensa
Sorumutu estraordináriu Konsellu Ministru nian iha loron 2 fulan Agostu tinan 2013
Governu Konstitusionál da-V hala’o sorumutu estraordináriu iha sesta-feira ne’e, loron 2 fulan Agostu tinan 2013 iha sala sorumutu Konsellu Ministru, iha Palásiu Governu, Dili, no aprova ona:
1. Parseria Públiku-Privada – Portu Tíbar nian
Ministra Finansa, Ministru Transporte no Telekomunikasaun ho International Finance Coorporation (IFC), ohin tuur hamutuk iha Konsellu Ministru hodi hato’o, posibilidade Parseria Públiku-Privada (PPP) oioin, rekezitu balu kona-ba infra-estrutura no mós rekomendasaun téknika balu iha relasaun ho Portu Tibar nian.
Aprezentasaun ba Konsellu Ministru haree mós kona-ba ezemplu sira husi Parseria Públiku-Privada balu no hanoin lubun ida kona-ba investimentu no retornu ba Governu. Liuliu kona-ba kazu Portu Tíbar no kona-ba infra-estrutura sira, halo ona estudu ho hanoin ida ba futuru no kresimentu no mós rekomendasaun téknika sira ne’ebé mak fó atensaun ba kestaun legál, ambientál no sosiál nian sira no kona-ba prosesu konkursu.
Konsellu Ministru aprova tiha ona modelu Parseria Públiku-Privada liuhosi konsesaun, nune’e nomós prosegimentu serbisu nian, tuir planu atividade ne’ebé mak tau ona, hodi prevee atu hahú konstrusaun Portu Tibar iha tinan 2015.
