Vise Ministru Justisa, Ivo Valente, halo vizita traballu durante loron ualu, hahú husi loron 1 – 8 Jullu 2013 iha nasaun Brazília, atu haree besik liu servisu setór justisa nian.

Durante vizita ne’e, Vise Ministru husu Governu Brazília, liuhusi Agência Brasileira de Cooperação (ABC), atu suporta rekursu umanu ba defensoria públika Timor-leste nian no husu Defensór Públiku atu fó asisténsia jurídika ba sidadaun sira.

Aleinde ne’e, nia mós husu apoiu husi ajénsia seluk, CAPES, atu suporta profesór lian Portugés nian, atu hanorin iha Sentru Formasaun Jurídika iha Timor-Leste.

Vise Ministru Justisa mós informa difikuldade balun, ne’ebé atór judisiál Timor-leste nian sira hasoru, nu’udar país foun. Nia informa mós kona-ba planu estratéjiku setór justisa nian ne’ebé sei fó vantajen boot, atu reforsa instituisaun justisa no bele kobre área atendimentu justisa nian iha territóriu tomak.

Ivo agradese mós ba apoiu husi juiz Brazileiru sira, ne’ebé fó kontribuisaun barak ona ba estabelesimentu sistema justisa iha Timor-Leste, husi kedas inísiu independénsia to’o ohin loron.

Durante iha Brazil, Vise Ministru Justisa hosoru malu ho Prokuradór Jerál Repúblika Brazíl, Dr.Roberto M.G.Santos, hodi informa kona-ba dezenvolvimentu setór justisa iha Timor-leste ne’ebé la’o di’ak, maibé presiza hadi’a nafatin kapasidade rekursu umanu.

Nia hasoru mós ho Vise Prezidente Superiór Tribunál Justisa, Gilson Dipp no Defensór Públiku Jerál Uniaun, Haman Cordova, Agência Brasileira de Cooperação (ABC) no vizita Ajénsia CAPES.

Gilson Dipp mak juíz ne’ebé iha esperiénsia barak tebes kona-ba funsaun tribunál Brazíl nian ho sistema ne’ebá atu hanesan ho Timor no Haman Cordova, ema ne’ebé konsege halo estudu kooperasaun bilaterál entre Timor-Leste ho Brazíl.