Primeiru-Ministru partisipa iha Sorumutu Inaugurál ba Fórum Dezenvolvimentu Illa sira Pasífiku nian
Loron: 5 to’o 7 fulan Agostu tinan 2013
Fatin: Sheraton Fiji Resort, Denarau Island
Sorumutu inaugurál ba Fórum Dezenvolvimentu Illa sira Pasífiku nian, ho tema: “Lideransa,Inovasaun no Parseria ba Ekonomia Verde/Azul Pasífiku nian” sei hala’o iha loron 5 to’o 7 fulan Agostu tinan 2013.
Ministériu Negósiu Estranjeiru no Kooperasaun Internasionál Fiji nian, Governu Fiji, no Fórum Dezenvolvimentu Ila sira Pasífiku nian maka sei sai hanesan uma na’in ba sorumutu inaugurál ba Fórum Dezenvolvimentu Illa sira Pasífiku nian, iha illa Denarau.
Fórum ne’e halibur Governu, empreza no líder sosiedade sivíl Pasífiku nian, atu hodi garante futuru Pasífiku nian liuhosi ekonomia Verde.
Primeiru-Ministru Xanana Gusmão sei hala’o diskursu iha sesaun ofisiál ba abertura nian, iha loron 5 fulan Agostu, hamutuk ho Primeiru-Ministru Illa sira Fiji nian, Commodore J. V. Bainimarama.
Knaar hosi Fórum ne’e nian mak atu kapasita ema Pasífiku nian sira hodibele kria mudansa pozitiva iha sira nia komunidade no iha sira nia nasaun, hodi habelar prátika di’ak liu sira ne’ebé iha ona, estratéjia, matéria, no ideia vizaun nian sira atubele alkansa sustentabilidade no hamenus ki’ak liuhosi ekonomia verde.
