Iha loron 20 fulan Juñu 2013, Sekretáriu Estadu Dezenvolvimentu Lokál, Samuel Mendonça anunsia kona-ba implementasaun programa PDID iha distritu Likisá.

Samuel Mendonça, akompaña hosi Diretór Jerál Dezenvolvimentu Lokál nomós Koordenadór Komisaun Dezenvolvimentu distritu Likisá, Miguel Pereira de Carvalho, hateten “Projetu ida ne’e la’ós tuir tenderizasaun maibé ne’e prosesu ajudikasaun ne’ebé maka durante ne’e EVAS (Ekipa Verifikasaun, Avaliasaun no Supervizaun) sira halo fiskalizasaun ba dokumentu ka profile kompañia nian iha territóriu laran tomak. Hafoin lori ba iha KDD (Komisaun Dezenvolvimentu Distritu) no líder administradór distritu sira hodi fahe tuir kategoria ba kompañia sira hotu ba klase A,B,C no D. Hosi rezultadu ida ne’e, maka fó sai fali avizu durante loron lima, hodi hein reklamasaun ruma hosi kompañia sira ba katogoria ne’ebé EVAS sira fó. Hafoin mak halo fali ajudikasaun tuir klase projetu nian sira ne’ebé maka EVAS no KDD sira fó ona ba kompañia sira. Tanba ida ne’e, mak ohin kompañia sira rona informasaun ikus nian hosi KDD distritu Likisá nian assina kontratu ba anu fiskal ba tinan 2013 iha distritu Likisá ba emprezariu na’in 35”.

“SEDL husu ba ba emprezáriu sira atu servisu ho di’ak ho responsabilidade, atu nune’e, bele halo buat di’ak ruma ba iha rai ida ne’e, tanba ita-boot sira maka parseiru di’ak ba futuru no ba governu lokál. Sekretáriu Estadu ne’e mós felisita Administradór, xefe suku sira, no ekipa tomak ne’ebé servisu, lori aselera duni projetu ne’e. Husu mós ba Xefe suku sira atu fó apoiu ba emprezáriu sira, tanba projetu tama iha ita-boot sira-nia fatin, nune’e mós bainhira atu implementa projetu iha fatin ne’ebé de’it, tenke husu lisensa ba xefe suku sira tanba sira mak hanesan autoridade  lokál”.

Tuir Administradór Distritu Likisá, Domingos da Conceição do Santos, husu ba emprezáriu Likisá oan sira, atu hatudu sira nia responsabilidade hanesan ema likisá- oan no kumpri regra sira ne’ebé iha, atu nune’e distritu ida ne’e bele la’o ba oin”.

Aleinde Sekretáriu Estadu Dezenvolvimentu Lokál, Samuel Mendonça, partisipa mós iha serimónia ne’e, Diretór Jerál no Nasionál sira, Diretór Distritál sira, komitiva hosi ADN (Ajénsia Dezenvolvimentu Nasionál) no GIGAI (Gabinete Inspesaun Jerál no Auditoria Interna), Chefe Departamentu sira, Emprezáriu lokál sira no komunidade distritu Likisá nian.