Ministériu Edukasaun ofisialmente simu Sentru Arte Gráfika no Impresaun ba Governu Timor-Leste, husi Governu Koreia do Sul, liuhusi Ajénsia Kooperasaun Internasionál ba Koreia (KOICA). Serimónia entrega sentru ne’e, halo iha Sentru Gráfika Komoro, tersa-feira, loron 23 fulan Jullu.

Ministru Edukasaun, Bendito dos Santos Freitas, agradese ba ajénsia KOICA no Governo Koreia do Sul, tanba konsege estabelese sentru nasionál ba gráfika no impresaun atu apoia Governu Timor-Leste liliu Ministériu Eduksaun.

“Apoiu ne’e, lori impaktu boot tebtébes ba Governu no Estadu nia servisu. Edukasaun mak sai baze ba mudansa transformasaun sosiál. Bainhira laiha livru ba alunu sira, kualidade rekursu umanu mós sei laiha,” nia esplika tan.

Nia mós hatutan,  “tulun husi governu Koreia ho volume boot, sai mós istória ba prosesu ba kualidade edukasaun, atu prepara rekursu umanu ho kualidade di’ak iha futuru”.

Molok entrega ba Governu, Sentru Gráfika ne’e imprime ona Manuál merenda eskola, livru istória Dom Boaventura no mós livru balun. Ba futuru, uza atu imprime materiál didátiku sira ba siklu dahuluk, siklu daruak no siklu datoluk inklui Ensinu Sekundáriu nian.

Ministériu Edukasaun fó prioridade kapasitasaun ba tékniku sira, atu asegura funsionamentu no manutensaun mákina, durante nia produsaun lorloron. “ Husu ba Diretór sira no ekipa servisu atu halo manutensaun, kontrola no taumatan ba seguransa edifísiu ne’e,” Ministru dehan tan.

Iha fatin hanesan, Embaxadór Koreia informa, “Governu Koreia sei kontinua harii koperasaun bilaterál, atu halo manutensaun rutina ba mákina,  atu funsiona ho di’ak nafatin hodi imprime livru ho kuantidade boot no kualidade aas ba alunu sira iha Nasaun ne’e nia laran”.

Funsiunáriu na’in 20 mak servisu iha Sentru Gráfika ne’e. Durante ne’e, KOICA mak selu saláriu. Maibé ba oin, Ministériu Edukasaun mak sei selu saláriu ba funsionáriu sira.