Sorumutu Estraordináriu Konsellu Ministru nian iha loron 29 fulan Jullu tinan 2013
Prezidénsia Konsellu Ministrus
V Governu Konstitusionál
..............................................................................................................................
Díli, Loron 29 Fulan Jullu Tinan 2013
Komunikadu Imprensa
Sorumutu Estraordináriu Konsellu Ministru nian iha loron 29 fulan Jullu tinan 2013
Governu Konstitusionál V hala’o sorumutu estraordináriu iha loron segunda ne’e, loron 29 fulan Jullu tinan 2013, iha sala sorumutu Konsellu Ministru nian, Palásiu Governu, iha Dili no aprova ona:
1. Renovasaun Kontratu Fornesimentu Diesel ba Sentrál Elétrika sira
Konsellu Ministru aprova ona renovasaun kontratu fornesimentu diesel ba sentrál elétrika sira ho empreza ETO (Esperança Timor-Oan), to’o fulan Janeiru tinan 2014, no Ministériu Obras Públikas mak hanesan responsável hodi prepara, to’o fulan Setembru tinan 2013, konkursu internasionál ida ba fornesimentu tuir mai.
Konsellu Ministru halo mós análize kona-ba:
1. Aprezentasaun projetu “Timor-Leste, Indonézia no Teritóriu Norte Austrália nian - Dezenvolvimentu Ekonómiku Rejionál Integradu”
Haree ba potensialidade Dezenvolvimentu Ekonómiku Rejionál Integradu Timor-Leste nian ida ho Indonézia, eis-Ministru Ekonomia no Dezenvolvimentu Governu Konstitusionál IV nian, João Gonçalves, aprezenta ba Konsellu Ministru inisiativa ida kona-ba projetu ne’ebé promove no fornese apoiu jurídiku no institusionál. Ministru Territóriu Norte Austrália nian sira hatudu ona sira nia vontade atu partisipa nafatin iha inisiativa ne’e.
Projetu ne’e hatuur liuliu iha tipu ligasaun tolu: fízika, institusionál no interkomunitária. Área hirak ne’ebé tama iha ligasaun fízika nian sira mak área transporte, informasaun no teknolojia komunikasaun no enerjia nian. Liberalizasaun Komérsiu, servisu no investimentu, rekoñesimentu husi parte sira kona-ba akordu, akordu rejionál sira kona-ba transporte, prosedimentu hirak kona-ba fronteira sira no programa ba kapasitasaun nian halo parte ba ligasaun institusionál nian sira. Ligasaun entre komunidade sira kompete ba área sira mak hanesan edukasaun, kultura no turízmu nian.
