Sekretaria Estadu ba Promosaun Igualdade (SEPI), fó tulun osan husi fundu Transferénsia Públika ba grupu feto hamutuk 70 husi distritu 13, atu hakbiit ekonomia, no kada grupu hetan osan entre USD $1.500 – USD $3.000. Eventu ne’e iha loron 18 Jullu iha edifisiu Sekretaria Estadu ba Promosaun Igualdade.

Gregório Guterres, reprezentante hosi Ministériu Finansa, informa, “ita bo’ot sira tenke uza osan ne’e, tuir planu proposta nian. Imi mós tenke hato’o relatóriu narativu, hamutuk ho fotokópia husi saldu konta bankária. Ami sei halo monitorizasaun ba grupu nia atividade hotu”.

Reprezentante Sekretária Estadu ba Promosaun Igualdade, João Lino, husi Departamentu Monitorizasaun no Avaliasaun, haktuir, “hahú tinan 2008, Sekretária Estadu ba Promosaun Igualdade hala’o programa Transferénsia Públika ho objetivu atu promove igualdade, entre feto no mane iha setór ekonomia, liuhusi haburas independénsia ekonómiku feto sira nian”.

“Liuhosi programa ne’e, feto hamutuk ho mane sira, bele dezenvolve atividade ruma, atu hasa’e kapasidade ekonómika, ne’ebé kontribui ba hamenus ki’ak no haburas dezenvolvimentu Timor-Leste”.

Reprezentante SEPI nian mós informa tan, “Iha tinan hirak liubá, observa katak, grupu balun hakerek sira-nia enderesu iha proposta, la hanesan ho realidade. Grupu balun inskreve husi distritu, maibé sira-nia membru hela iha kapitál Díli no balu la hatene sira Xefé Suku ka Xefé Aldeia. Ami husu ba ita bo’ot sira, la bele komete fali erru sira hanesan  grupu sira  uluk halo ne’e”.