Sekretaria Estadu Arte no Kultura (SEAK) asina Memorandu Entendimentu ho Institutu Peskiza ba Dezenvolvimentu nian (Institute of Research for Development – IRD) husi Fransa, iha loron 9 fulan Jullu, iha Edifísiu Ministériu Turizmu, Faról, Dili, atu hametin relasaun di’ak iha área turizmu nian no halo peskiza ba materiál patrimóniu kultural Timor nian, hanesan iha distritu Lautem, Covalima no fatin seluk ne’ebé riku iha poténsia turístika.

Akordu ne’e, asina atu hametin servisu entre Sekretária Estadu Arte no Kultura, Maria Isabel de Jesus Ximenes, ho reprezentante Institutu Peskiza ba Dezenvolvimentu nian, Michael Laurent, liuhosi estudu sientífiku iha área arkeolojia ninian: “ooperasaun ne’e sei hala’o durante tinan haat nia laran no bainhira programa ne’e ba la’o oin ho di’ak mak ami sei prolonga tán. Tékniku sira sei mai hosi Fransa inklui mós Timoroan ne’ebé iha esperiénsia barak iha área ne’e rasik”, informa Sekretária Estadu.

Reprezentante Institutu Peskiza ba Dezenvolvimentu nian, Michael Laurent, afirma katak “instituisaun ne’e sei fó apoiu tékniku iha área arkeolojia, liuhusi haruka tékniku espesializadu sira husi Fransa mai Timor-leste hodi servisu hamutuk ho arkeólogu sira ne’ebé hala’o hela knaar iha Sekretaria Estadu Arte no Kultura nian”.

“Kooperasaun ida ne’e importante tebes, atu identifika materiál patromóniu kulturál Timor-Leste nian, ne’ebé barak mak iha hela rai okos,” Michael Laurent informa.