Sekretaria Estadu Água, Saneamentu no Urbanizasaun, liu hosi Diretór Nasionál Servisu Água, Gustavo da Cruz, iha semana ikus fulan Juñu, hala’o sosializasaun kona-ba tarifa bee moos nian, tuir diploma ministeriál no. 1/2004 loron 11 fulan Fevereiru ba Autoridade Lokál sira iha sidade Dili, ne’ebé hahú uluk hosi Suku Santa Cruz, loron 25 fulan Juñu.

“Iha fulan Agostu tinan ida ne’e, ita hahú ona implementa selu tarifa ba konsumidór sira bee moos iha sidade Dili, tuir diploma ministeriál tarifa abastesimentu bee nian sei hala’o kobransa fulan-fulan tuir kategoria idaidak mak hanesan: kategoria kliente doméstika (uma hela fatin) konsumu ka gastu to’o litru 14.000 tarifa ba bee moos litru 1.000 mak $0,20, liu litru 14.000 tarifa ba bee moos litru 1.000 mak $0,40, kliente sosiál (fontenáriu/torneira públiku, ba bee moos litru 1.000 mak $0,10, no sosiál (igreja, mesjid, pagoda, ospitál, eskola no seluk tan,) tarifa ba bee moos litru 1.000 mak $ 0,15.

Diretór ne’e esplika tan, “implementasaun tarifa bee moos nian ne’e, hanesan kontribuisaun atu ita sente katak buat ne’e ita nian rasik, ninia impaktu pozitivu. Bainhira selu ona tarifa bee moos nian, ita mós iha ona konsiénsia atu uza bee ho didi’ak, atu nune’e ema seluk mós bele hetan bee moos”.

Xefe suku Santa Cruz, Manuel Correia, haktuir, “sorumutu ida ne’e konvida mós xefe aldeia sira atu rona informasaun hirak ne’e no ami sei hatutan fila fali ba ami nia membru konsellu suku sira atu fahe no sei habelar mós informasaun ba komunidade sira, atu nune’e sira mós bele kompriende saida mak sira nia direitu no devér.

Sosiaziasaun ne’e sei kontinua hala’o mós iha suku sira iha sidade Díli, hanesan, Bemori, Kampu Alor, Fatuhada, Bairo-Pite, Bidaun Santana no Metiaut.